Ko e taha e tuʻutuʻuni ngāue tefito ʻa e Pangikē Pule΄ ko e fakapapauʻi ‘oku malu ma’u pē tu’unga fakapa’anga ‘a e ngaahi pangikē ‘i Tonga΄ ‘i he taimi kotoa ‘o kau ki heni hono fakapapau’i ‘oku ‘i he tu’unga lelei ma’u pē ‘a e sino’i pa’anga tefitoˊ (capital) pea fe’unga mo e pa'anga ngāue (liquidity) 'i he kotoa ‘o e ngaahi pangikē ‘e fā kuo laiseni ‘e he Pangikē Pule΄. ‘I hono fakakātoaˊ, na’e ‘i he tu’unga fe’unga pē ‘a e pa'anga ngāue 'o e ngaahi pangikē ʻi he taʻu ʻe hongofulu kuo maliu atuˊ ‘o au mai ki he ‘aho ni.
Ka neongo ia΄, ‘oku toe lahi ange ‘a e ‘ikai malava ‘o totongi fakafoki ‘a e ngaahi noo΄, ‘o hā eni ‘i he hiki hake ‘a e lahi ‘o e ngaahi nō palopalema ‘a e ngaahi pangikē ki he peseti ‘e 11.2 ‘o e fakakātoa ‘o e ngaahi noo΄ ‘i he’ene a’u ki he ʻaho 30 ʻo Sune 2024΄ ‘o fakahoa ki he peseti ‘e 9.1 ‘i he ta’u kuo’osi΄ pea mo e peseti ‘e 3.4 ‘i he ‘aho 30 ‘o Sune 2021΄. Koe nō palopalema΄ ‘oku uhinga ia ki he nō kuo ‘ikai ke toe lava ‘e he tokotaha nō ‘o totongi fakafoki ‘a e sino’i nō mo e totongi tupu΄ fakatatau ki he aleapau nō ‘i he vaha’a taimi ‘oku angamaheni ki he ‘aho ‘e 90 pe loloa ange ai.
‘Ii hono mahu‘inga fakapa‘anga΄, na’e fe’unga mo e pa‘anga ‘e T$16.2 miliona ‘a e fakakātoa ‘o e ngaahi nō palopalema΄ ‘i he ‘aho 30 ‘o Sune 2021. Pea ‘i he a’u mai ki he ‘aho 30 ‘o Sune 2024, na‘e hiki e lahi ‘o e nō palopalema ‘o fe’unga fakakātoa mo e pa’anga ‘e T$58.1 miliona.
‘Oku tokanga ‘a e Pangikē Pule΄ ki he tu’unga fakautuutu ‘oku ‘i ai ‘a e ngaahi nō palopalema΄, pea kuo pau ke muimui’i ofi mo fakahoko ‘e he Pangikē Pule΄ ha ngaahi tu‘utu‘uni fakangāue ke ta’ota’ofi ‘aki ha ngaahi uesia ‘e malava ke hoko.
Fakatatau kia Kovana Moeaki΄: “I he tu‘unga fakautuutu ko eni΄, ‘oku matu‘aki mahu’inga ke muimui pau ‘a e ngaahi pangikē kuo laiseni΄ ki he ngaahi lao mo e tu’utu’uni ngāue´ ke malu ‘a e tu‘unga fakapa‘anga΄, pea malu’i foki mo e kakai ‘oku fakahū pa‘anga΄, kakai ‘oku nō΄, pea mo e kotoa ‘o e ngaahi kupu fengaue‘aki΄”
“Na’e toe tānaki ‘e Kovana Moeaki, “Oku fakahoko ma’u pē ‘e he Pangikē Pule´ ‘a hono ngaahi tefito’i fatongiaˊ mo e tu’utu’uni ngāueˊ ‘i ha founga loto ma’a pea ‘oku tatau ki he taha kotoa pē. ’Oku toe fakamamafa’i atu ‘e he Pangikē Pule΄ ki he kakai ‘o e fonua´ ‘a ‘ene tokanga lahi ke fakahoko ‘a hono tefito’i fatongia΄ ‘o fakatatau ki he ngaahi lao΄ mo e tu’utu’uni ngāue´, ‘a ia ko e tauhi ke ma’uma’uluta mo feau ‘a e tu’unga fakapa’angaˊ pea mo e ngāue fakapangikē ‘i Tonga´”.
--
