Katoangaʻi ‘e he ‘Ofisi Talafekau Lahi Pilitania ʻi Nukuʻalofa ‘a e ʻaho fakahifo ‘o ‘Ene ‘Afio ́ Tu‘i Salesi III pea mo hono fakamahu‘inga‘i ‘o e va fakakaume‘a mo e Puleʻanga ʻo Tonga ́
Naʻe matu‘aki hounga mo langilangi‘ia moʻoni ʻa e ‘Ofisi Talafekau Lahi ‘o Pilitania ‘i Tonga ‘i he me’a fakaafe fakalangilangi ʻa e Tama Pilinisi Kalauni ́ Tupouto‘a ‘Ulukalala mo e Ta‘ahine Pilinisesi Kalauni ́ Sinaitakala Tuku‘aho ‘i he efiafi fakaʻilonga‘i ‘i Tonga ʻa e ʻaho fakahifo ʻo ‘ene ‘Afio ́ Tu‘i Salesi III ʻi he ʻaho 20 ʻo Sune 2024 ʻi Ancient Tonga. Ko e faka‘ilonga‘i eni ʻa e va fakakaumeʻa mo e fetuʻutaki vaofi ʻo e ongo Puleʻanga Fakatu‘i ́ ni.
Na‘e ‘alo‘i ‘a ‘Ene ‘Afio Tu‘i Salesi III ‘i he ‘aho 14 ‘o Novema 1948 pea ne hoko ki he taloni ko e Tu‘i ‘o Pilitania mo e Ngaahi Fonua Kominiueli ‘i he ‘aho 6 ‘o Mē 2023. Na‘e hoko ‘a e Hilifaki Kalauni ‘o ‘Ene ‘Afio ko e makamaile mahu‘inga taha ia ki he kakai ‘o Pilitania ‘o e 2023. Na‘e katoanga‘i ‘i Pilitania ‘a e ‘Aho Fakahifo ‘o ‘ene ‘Afio ́ ‘i he ‘aho 15 ‘o Sune, ‘o fakahoko ai ‘a e ouau laka fakalangilangi ‘i Lonitoni (‘oku ‘iloa ko e Trooping The Colour).
‘I he me‘a ‘a e ‘Eiki Talafekau Lahi ‘o Pilitania ki Tonga ́, Philip Malone, na‘e ‘i ai ‘a ‘ene tokanga makehe ki he tu‘uloa ‘o e va fetu‘utaki ‘o e ongo pule‘anga fakatu‘i ́ ‘o fakatefito ‘i he ongo Fale ‘o e Tu‘i ́ mo e Kominiueli. Na‘a ne me‘a ‘o fakahounga‘i ‘a e hā‘elea ‘e he ‘Ena ‘Afifio Tama Tu‘i ́ Tupou VI mo Ta‘ahine Kuini Nanasipau‘u ‘a e hilifaki kalauni ‘o Tu‘i Salesi III ‘i he ta‘u kuohili.
Na‘e fakamamafa‘i makehe foki ‘a e ‘Eiki Talafekau Lahi Pilitania ́ ‘a e ngaahi ngāue poupou ‘a e Pule‘anga Fakatahataha ‘o Pilitania ́ ki he pule‘anga mo e kakai ‘o Tonga ́, ʻo fakafou ʻi he va ngāue fakataautaha mo e fengāueʻaki ‘i he ngaahi sino fakatahataha. Ko e ngaahi kaveinga ngāue hangē ko e feliuliuaki ʻo e ʻea, ma‘u‘anga ivi, fakalakalaka fakaʻekonomika, maluʻi ʻo e ʻatakai pea pehē ki he ngāue fakamaauʻanga, malu mo e hao ‘i he va‘a ngāue fakapolisi mo e maluʻi fakakautau. Naʻa ne me‘a ‘o talamonū ke lakoifie fuoloa mo monimonū monitonu ‘a ‘Ene ‘Afio Tupou VI.
Na‘e me‘a ‘a e ‘Eiki Palemia ‘o Tonga ́, Honourable Hu‘akavameiliku ‘o ne fakamahino‘i ‘a e ngaahi va fetu‘utaki makehe ʻo e ongo fale ‘o e Tu‘i ́ kae‘uma‘ā ‘a e fāmili kominiueli. Pea ʻoku kei hoko pē ʻa Tonga ko e kaungāmeʻa faivelenga mo e kaume‘a ofi ‘o e Ngaahi Pule‘anga Fakatahataha ‘o Pilitania ́. Naʻe me‘a ‘a ‘Eiki Palemia Huʻakavameiliku ‘o ne talitali lelei ki Tonga ni ʻa e ‘Eiki Talafekau Lahi ʻo Pilitania ki Tonga, Philip Malone ʻo ne fakamālō‘ia ‘a e fakahoko ngāue ‘a e ‘Eiki Talafekau Lahi ́ mo e ‘Ofisi Talafekau Lahi ʻo Pilitania ‘i Nuku‘alofa ki hono tauhi ke kei tu‘uholoaki ʻa e va ʻo e Ngaahi Pule‘anga Fakatahataha ‘o Pilitania mo Tonga ́. Naʻe meʻa ʻa ‘Eiki Palemia
Huʻakavameiliku ki hono lelei ki he puleʻanga Tonga ‘a ‘ene hoko ko e hoangāue mālohi mo lelei ʻo Pilitania, ʻo fepoupouaki ki he melino fakavahaʻapuleʻanga, malu mo e hao ́ pea mo e fakatuʻumālie ́. Naʻa ne fakahoko ‘a e talamonū ke lakoifie fuoloa mo monimonū monitonu ‘a ‘Ene ‘Afio Tu‘i Salesi III.
Ko e mahu‘inga lahi ‘a e ngaahi va fengāue‘aki mo e kau fakaafe kotoa ‘o e ‘aho ́ koe‘uhi ko e ngāue fakataha ki hono tauhi mo tupulaki ‘o e va fakakaume‘a ‘o e ongo fonua ́.
--
#8018 Sponsored Media Release, posted by the British High Commission in Nuku‘alofa. Tonga, 25 June - 09 July 2024.
