Ha’a Faifekau mo e kosipeli

Ko ha'a faifekau 'i 'Amelika. 'I he'emau hiki mai ki he fonua Kalisitiane ko'eni, na'aku fakatokanga'i 'a hono 'ohofi 'o e lakanga faifekau 'ehe toko lahi, hange nai ha konga pulu-masima. 'I ai mo e kakai fefine kae lahi ki he kakai tangata, tautefito ki hoku kaunga ako meihe Kolisi ko Tupou. Na'aku fu'u 'ohovale 'aupito, he ko hono 'uhinga ko e toko lahi 'o e fa'ahinga ko'eni ia, pe na'anau sio koa 'i falelotu pe 'ikai 'i Tonga. Peau pehe, si, liliu fakaofo 'eni kuo hoko ki he kau tangata ni 'i he fonua ni. Na'aku fakatokanga'i 'a e lahi fau 'a hono fokotu'u 'o e fanga ki'i siasi, pea mo 'enau vavaofi pe, meimei taki famili atu pe 'e fa, nima he fanga ki'i siasi 'e ni'ihi. Peau toki 'ilo kimui, ta ko hono 'uhinga, 'oku 'ikai ko e fakamafola 'o e kosipeli, ka ko e konga pulu-masima. 'I he 'alu pe 'a e taimi, pea lahi ange 'eku fanongo ki he launga ma'u pe 'a e kakai ki he fakavalevale 'a hono kai 'ehe kau faifekau 'a e pa'anga 'a e siasi, kau ai mo e kau tangata kolisi tutuku na'e ako'i kinautolu 'i he Kolisi ko Tupou. 'I he fatongia na'aku fai 'oku te lave'i ai 'a e ma'ulalo 'a e mo'ui faka-molale 'a e kau faifekau tokolahi 'i he 'asi honau hingoa 'i he lekooti 'o e maumau'i 'o e lao 'oe Pule'anga 'oe fonua 'oku mau nofo 'aunofo ai. Na'aku foki atu ki he ngaue he 'aho 'e taha, talamai 'e hoku kaunga ngaue, Saia, sio ange pe 'oku ke 'ilo 'a e tama ko e (mugshot). Talami 'e ia na'a mo ako fakataha. Peau sio hifo ki he la'ita ko e faifekau na'ama ako fakataha 'i Toloa, pea na'aku toki fanonga pe he'ene malanga 'i he uike taha. Kou pehe ange, 'io ko e tama na'ama ako fakataha, ka 'oku faifekau. 'Ikai ngata ai, ka ko e lahi taha 'o e ngaahi siasi ia, 'oku 'ikai ke lesisita, pe fakalao 'i he fonua muli ko'eni. Lahi 'aupito taimi kuo me'a mai kau taki ma'olunga 'o e ngaahi siasi 'i Tonga ki he ngaahi fakataha mo e ngaahi ouau faka-siasi mo e ngaahi siasi 'i 'Amelika ni, kae hili koia 'oku 'oku ta'e-fakalao mo ta'e lesisita 'a e ngaahi siasi lahi ia 'i 'Amelika ni. Kau 'a e polokalama kolisi tutuku 'a e Kolisi ko Tupou 'i he fakapoongi fanga ki'i siasi ni'ihi. 'Oku fakamole pe 'a e laui kilu ia 'i ha fo'i katoanga, pea na'e toe no mai mo e laui mano meihe siasi koia, ke fakalahi 'aki fakafiefia. Hili pe katoanga, kuo feholaki kau Kolisi tutuku Toloa ia, kae pehepehe'i hifo aipe 'a e misinale ia si'i kau vaivai, 'ikai totongi pa'anga 'a e siasi, he ko e faifekau ia ko e tama Toloa. Ko ha'a faifekau 'i 'Amelika ni, 'oku 'ikai ko e fakamafola kosipeli, ko e konga pulu-masima. Te u ngata a he na'a 'ita mai hoku kaunga ako meihe Kolisi ko Tupou......SAIA