'Etita,
Ko ha ki'i fakatangi tu'a mei muli ki Tonga fakalukufua.
'Oku mau kole ke fakamalumalu pea mau lango vaka atu he Talamalu 'o e Fonua na'e to pou mo fuofua tanumaki he kau Moana 'o ono'aho. Pea mo Tangaloa 'Eitumatupu'a mo e kau Tangaloa 'o e Langiloa, pea pehe kia Maui Kisikisi mo e kau Maui 'o Maama, ka e 'uma'a 'a e 'otukohi 'o Tu'i Langi, Tu'i Kelekele mo Tu'i Kakai. Pea mo e Tufungafonua 'a Lo'au 'o e Tu'i Ha'amea , ka e 'ata ke fakafolau atu 'a e poupou fakatu'a ko 'eni mei he ngaahi Kalapu Fofo'anga 'Aositalasia.
Ko ha poupou pe 'eni ke langolango atu ki he fokotu'u fakakaukau kuo fai mai mei he kau makatekina 'o e Kalapu Fofo'anga 'Amelika Ha'amoa ne folahi mai he kupenga vahaope 'o e Matangi Tonga.
'Oku fakahoko atu 'a 'emau poupou kakato ki he fili 'a e kau Fakafofonga Kanititeiti kuo folahi atu 'e he Fofo'anga 'o 'Amelika Ha'amoa, 'o tautautefito ki he kau Fakafofonga 'o Tongatapu.
'Oku mau kole atu ki hotau Kainga Tonga kotoa pe 'i Tonga ke mou fakakaukau fakamaatoato pea fai'aki 'a e fakapotopoto taha ke 'oatu ha kau Fakafofonga fo'ou, 'a e kau Fakafofonga kuo fokotu'u atu 'e he Fofo'anga 'Amelika Ha'amoa ki he 'amanaki 'o e Fili Falealea mahu'inga taha 'o e ta'u 2008.
'Oku mau poupou kakato atu, pea mo ha tanaki atu pe 'a e kau Fakafofonga ki Vava'u mo 'Eua 'oku nau mateuteu ke foaki mo'ui, ngaue mo e fakakaukau ke kau atu ho'omou fakakaukau teuteu fili, 'a ia ko Viliami Uasike Latu mo 'Etuate Lavulavu ko e ongo Fakafofonga Kanititeiti ma'ae Lolo-'a-Halaevalu, pea mo Saia Hausia ko e Fakafofonga ki he Funga Fonua.
Tongatapu:
'Inoke Fotu Hu'akau
Sione Fonua
Latanoa Pikula
Vava'u:
Viliami Uasike Latu
'Etuate Lavulavu
Ha'apai:
Kamipeli Tofa
'Osaiasi Latu
Niua:
Peau Haukinima
Kuo hoko e tumutumu 'o e faka'auha 'o Nuku'alofa 'e he kau Temo ke ne talamai kiate kitautolu 'oku mahu'inga ke tau saupulu hotau kalia fakapolitikale mei he tafa'aki 'o e fili 'a e kau Fakafofonga e Kakai, ke tuku mai 'a kinautolu kau Fakafofonga lolotonga ke nau ma'u ha malolo nonga kitu'a 'o tauhi lelei honau sino, 'atamai mo e laumalie he kuo 'asi mai 'oku nau mahamahaki lahi pea 'oku 'ikai ke kau lelei ki he'etau ngaue mahu'inga ko e tufungafonua 'oku tau hanga atu ki ai ke fakahoko. Ka e tuku atu ha kau Fakafofonga fo'ou te nau lava 'o fai 'a e saupulu 'i ha founga 'oku faka-Kalisitiane, fakatemokalati, mo fakasivilaise ange.
Faka'apa'apa atu,
Pouvalu 'o e Fofo'anga 'Aositalasia
siosiua [at] nuama [dot] org
