'Etita,
Tau'ataina 'a e ongoongo. Kuo mahino mai eni mei he me'a 'a e minisita ki he ma'u'anga fakamatala pe Information, ko e pule'anga ne nau ta'ofi hano toe fakamafola 'e he letio mo e televisone Tonga ha ongoongo mei he Falealea pea pehe ki he fakapolitikale. Ka kimu'a ai ne nau tala ko e tu'utu'uni pe ia 'a e TBC.
'Oku lahi e ngaahi me'a ia 'oku mahino mai he me'a 'a e 'Eiki Minisita. 'Uluaki ta 'oku 'ikai ko e palopalema 'a e tu'utu'uni huluhulu ngaue pe guidelines. 'Oku ou tui 'oku 'osi 'i ai e me'a pehe 'a e potungaue pea mo e ngaahi me'a faka'efika. Pea ne toe me'a mai 'o pehe ne fakaha ange 'e he pule 'o e TBC 'oku 'I ai e 'asenita fakapolitikale 'ene kau ngaue pea koena ko e taha ena 'ene kau 'ofisa ma'olunga Nanise Fifita 'oku ne toe filingaua he fokotu'utu'u fa'u guidelines 'a e pule'anga.
Sai 'uluaki, ko e palopalema ia ko e pule 'o e letio mo e televisione Tonga. Ko e toe fakaa'u e me'a ki he palemia kae 'ikai kene fakangata pe he loto'i potungaue. ('I ai e 'asenitia fakapolitikale; ene kau ngaue) Koeha ka toe fiema'u ai ha guidelines kuo 'osi 'i ai pe policy 'a e potungaue pea 'oku maaumalie ai e ngaahi me'a ko ena 'oku fiema'u. 'Oku 'ikai ke u tui ki he lau 'a e minisita 'oku ta'epalanisi e lipooti e tipeiti 'i he Falealea. Ko e mo'oni 'oku 'ikai palanisi ha me'a ia ko e tipeiti he 'e malohi mo le'olahi ange e faha'i 'oku nau poto he tipeiti mo ngutu mo'ui he me'a ko e tipeiti. Te ke fakapalanisi fefe ha fo'i poini 'e taha mo e poini 'e 10 mei he tafa'aki 'e taha. Kou tui au ko e kamata ena hono fokifokihi 'o e letio mo e televisone Tonga. Ko e pule'anga 'e fili hoko te nau liliu e me'a ko ena ki he'enau fiema'u. Fokotu'u atu ke 'ai mu'a ha pule 'a e TBC 'oku 'I ai hano taukei he mala'e 'o e fakamafolalea. Lahi pe kakai hena mo honau mata'i tohi pea mo 'enau 'ilo.
Faka'apa'apa lahi ki he pule lolotonga. Tukuange pe mu'a TBC moe Kalonikale ke na tau'ataina he 'oku 'ikai 'uhinga hono fakapa'anga 'e he pule'anga kinaua ke ne pule'i ai kinaua he 'e fepaki ia mo e me'a 'oku na tu'u ki ai 'a e tau'ataina 'a e ongoongo.
Faka'apa'apa atu,
Pola Loiti
polaloiti [at] yahoo [dot] co [dot] nz
