'Etita,
Na`e fuofua hu ki he Fale Alea Tongá `a Samiuela `Akilisi Pohiva `i he to`u Fale Alea `o e 1984-1986 `a ia ko e lava `eni `a e ta`u `e 21 `ene fai fatongia ma`a e kakaí. Ko kinautolu ne kaunga Fakafofonga mai mo ia `i he 1980 tupú kuo nau mavahe hono kotoa, pea lolotonga `a e 1990 tupú ki he 2000 na`e fetomokosi holo pe.
Ko e malohinga `o `Akilisí ko hono fakamafola ha ngaahi fehalaaki kuo mama mai mei loto Pule`anga `o ne pulusi ia `i he`ene pepa ko ia ko e "Kele`á" pea toki toutoumoliliu hono `ohake `i he ta`u kotoa pe lolotonga `a e ngaahi feme`a`aki `a e Falé.
Kapau te tau vakai ki he ngaahi miniti `o e Fale Alea `o Tongá pe kuo tu`o fiha nai `a hono `ohake `e he Fakafofongá `a e Pa`anga mo e Fakatau Paasipootí, kuo `osi laka hake ia `i he tu`o nimangofulu nai. Kapau te tau tanaki `a e ngaahi fetoumoliliu ko `ení `i he me`a tatau `i he ngaahi ta`ú, ko e toki me`a fakatumutumu ia `a e lahi fau `a e taimi `o e Falé kuo matu`aki maumau`i koe`uhi ko hono toutou lau `a e ngaahi me`a kuo `osí.
Ka fai hano vakai`i fakaikiiki `i he lekooti `a e Fale Aleá `i he ta`u ko `eni `e uofulu-ma-taha `o e Fale Alea `a `Akilisi Pohivá pe ko e ha ha`ane fo`i fokotu`u fo`ou kuo langaki hake ai `a e fonuá, `oku ou tui `oku faingata`a `aupito ke ma`u ia. Ko e tangata foki `eni `oku faka`ilonga `i he Akó, ko e ha ha`ane fokotu`u kuo hoko `o fakalelei`i ai `a e ngaahi ako `o Tongá? Ko e ha ha`ane ngaahi fokotu`u fo`ou faka`ekonomika kuo ta`imalie ai `a e kakai `o e fonuá koe`uhi ko e ngaahi fakalakalaka na`e hoko ai `o `inasi kotoa ai `a e fonuá?
Na`e ta`u lahi `a e tau toitoi `a e kau ngaue fakapule`anga tokolahi `o nau fafanga `a `Akilisi `aki `a e ngaahi fakamatala mei loto pule`anga `o fai `aki `ene vilo paté.. Ko e tokolahi `o e fa`ahinga ko iá kuo nau `osi kotoa ki tu`a. Na`e `i ai mo e kau mo`unga`i tangata `i he mala`e `o e akó mo e politikí na`a nau `atamai kinautolu ka nau me`angaue`aki `a `Akilisi ke kofekofe `i he Falé, `ene nusipepá, `i he ngaahi fakataha`angá, pea mo muli ni foki. Ko e meimei kotoa `o e fa`ahinga ko `ení kuo nau fakamama`o mei a `Akilisi pe kuo nau fetukutuku atu ki Pulotu.
Ka `i ai ha ngaahi me`a `oku te pehe ko e tofi`a ia `o Samiuela `Akilisi Pohiva `i hono ta`u `e uofulu-ma-taha `i he Fale Aleá, ko `ene kikivoi ke taliui `a e Pule`angá ki he kakaí mo e fonuá tautau tefito `i he taimi `oku nau ngali faihala aí. `I he taimi tatau koe`uhi ko `ene founga ngaué, na`a ne fakangalikovi`i `i he taimi lahi `a e fonuá, `a e Pule`angá, pea ne `ohofi fakafo`ituitui `a e kau takí mo e kau ngaue `a e fonuá. Kuo ne matu`aki lavame`a `aupito `i he`ene ngaahi kaveinga ko `ení.
Taumaia na`e lava ke fakafuofua`i `a e ngaahi maumau `i hotau tu`unga fakavaha`apule`angá koe`uhi ko e ngaahi ngaue ko `eni `a e fakafofongá pea mo hono ngaahi kaunga ngaué.
`Oku ou tui ta`e toe veiveiua ko e `amanaki `a Samiuela `Akilisi Pohivá ke ne hoko ko e taki fakakatoa ia `o Tongá. Ko e natula nai `eni `o e tangata ke taki `a Tonga kotoa `o hoko nai ke ne fetongi `a `Ulukalala Lavaka Ata ko e Palemia ia `o Tongá? `Oku ne ma`u nai `a e taukei mo e maheni ngaue fe`unga ke fakahoko `a e fatongia ko `ení? Te ne lava nai `o matu`uaki hano fai atu kiate ia `a e ngaahi me`a ko `eni kuo ne fai ki he Pule`angá mo e ni`ihi kehe kuo ne fakafepaki`í?.
`Oku ou tui ta`e toe veiveiua ka faifai angé kuo lava `a e feinga liliu ko `eni `a e Kau Temó, `e tuaikemo ke ha sino mai pea toki `asi mai ki mu`a `a e kau tangata `oku nau toitoi mai he tu`a `o Samiuela `Akilisi Pohiva, kae si`i tekelele ia ki tu`a.
Samiuela `Akilisi Pohiva, malo e ngaue lahi he ta`u `eni `e 21 `i ho`o fai fatongia `i he Fale Alea `o Tongá. Kuo ke to atu, ka `i he mala`e `o e Temó `oku ke feinga ke tohoaki ki ai `a Tongá, kilokilo holo ki ho tafa`akí pea ki he fa`ahinga `oku nau `atakai`i koé he `oku matu`aki mahulu ange `enau fie takimu`á `a kinautolu ia pea mateuteu ke fa`oa `a e lakanga Palemiá meiate koe.
Vakai na`a kuo ke fe`unga ka ke tauhi lelei a na`a ke mate maumau!
Teu toki hoko atu.
`Ofa-ki-Tonga
OfaKiTonga [at] comcast [dot] USA
