'Etita
Fakamalo lahi he tali kuo fai mai. Ta koena 'oku 'ikai ha fakataataa 'o e lava me'a 'a 'Akilisi, te ke lava 'o 'omai ho'o tohi, ta na'e mei sai ange ke tuku 'oua te ke to e tohi mai he na'e 'ikai ha poini ia ho'o to e tali mai. Kataki pe ka ke tohi mai pe he poini 'oua 'e fai ha 'ohofi fakafo'ituitui 'oku 'ikai ke u tui ko e founga lelei.
'Oku 'i ai pe ha poini 'e ua te u lave kiai 'i ho'o tali ne 'omai. '
'Uluaki, ko ho'o pehe ko e ...."fakaehaua 'a e pule'anga ma'u mafai ta'e to e fakafepaki'i".... Kataki pe, hange ko 'eku kole ki mu'a, 'omai ha fakataataa mahino e fakaehaua 'a e pule'anga mo e ta'e to e fakafepaki'i ke ta talanga ai he koau ko u manako ma'u pe ki he lue he hala pule'anga pea ulo mo e maama hala, 'ikai ke u sai'ia he hala vao mo e fakapoopoo'uli.
Ko hono ua, ko ho'o pehe ...... "mono ho ongo va'e he suu si'i kau masiva 'i Tonga ke ke ongo'i 'enau faingata'a'ia"... Mosese, kataki pe, kau ki'i talaloto atu. Ko e finemotu'a tu'a kita, 'ikai hato konga kia hou'eiki, ko e laauvale mo e kainangaefonua, mei he kalasi ma'ulalo taha 'o e kakai 'i he tu'unga masiva taha 'o e fonua. Koe'uhi ko 'eku masiva faka'ofaa, na'e 'ofa e pule'anga fakatu'i 'o foaki mai ha ngaahi sikolasipi ma'aku mo hoku ngaahi tuonga'ane mo hoku ngaahi tokoua, pea ko e 'ofa to matakakano koia 'a e pule'anga fakatu'i 'iate au masivaa, he 'ikai pe lava ke mangalo 'i he'eku mo'ui mo hoku ki'i famili tu'a. 'I he maama kuo mau ma'u, na'e lava ke mau langa ai ha ki'i fale papa ke fetongi'aki homau ki'i fale Tonga, pea lava ke ma'u mo ha ki'i me'alele ke mau fononga ai ka e tuku e luelaloo. 'I he taimi ni kuo mau lava 'o fokotu'u pe mo 'emau ki'i pisinisi ke ma'u mo'ui mei ai homau famili. Ko e me'a pe ia 'a e pule'anga fakatu'i na'e fai, ko hono fakaako'i au masiva ke kumi ai 'eku fakalakalaka. Kou tui pe kuo popo hoku ki'i suu, ka 'oku ou kei laukau ai.
'Ofa lahi atu.
Janine Popoahi
aspun_pop [at] yahoo [dot] com [dot] au
