'Etita,
Kei fakamalumalu atu he Tala 'o Lo'au mo e Talamalu e Fonua, pea ke 'oua na'a taku ko ha'ate manongisia, ka e 'oatu 'a e fie kaunga mamahi mei he Sosaieti Fakatotolo `a e Lo'au (Lo'au Research Society), keu fakatulou pea fakatapu mo e Ha'a Tu'i La'a kuo Unga Fonua.
Ki he Tama Tu'i ko Taufa'ahau Siaosi Tupou V, Ta'ahine ko Kuini Halaevalu Mata'aho, Pilinisesi Salote Mafile'o Pilolevu Tuita mo Paloni Tuita, Pilinisi `Ulukala-Lavaka-Ata mo Pilinisesi Nanasipau'u pea mo e kotoa `o Ha'a Ma'afu, Ha'a Latuhifo, Lauaki `o Ha'a Maliepo mo Motu'apuaka `o Ha'a Molofaha, Ha'a Ngata mo Ha'a Havea, pea kia Nopele Kalaniuvalu mo Kauhala'uta, Tu'i Pelehake mo Ha'a Talafale, Ha'a Fale Fisi mo e Ongo Ha'a Ngana, Ha'a Vaea, Ha'a Fokololo-e-Hau, Ha'a Latukefu mo e ngaahi Ha'a kotoa he malumalu `o `Ahau, Fonuamotu mo Olotele.
Pea ke a'u atu foki kia Palemia Dr Feleti Sevele `o e Pule'anga Tonga mo e Tonga kotoa pe `oku a'u atu ki ai `a e fakahoha'a he ope.
Kuo to `a e la'a `o e Toa-ko-Ma'afu `i he Sia-ko-Veiongo `o e
Makamaile, pea `oku tauanga'a fakataha ai mo e tu'unga matu'a mo e finematu'a `o e LRS `i Ma'ananga he Lepa `o Fualu `i Ha'amea, pea mo nau kaunga tangilaulau he `oiaue, `oiau e, `oiau e homau fakapo !
Kuo lala `a e Hala Vaha'akolo mo e Hala Tu'i, he kuo popo'uli `a e hu'anga matapa tapu `o Fangatapu.
Pea `oku tutulu mo tangilaulau `a Tohu'ia-`o-Futuna mo e `apa'apa `o Velelahi mo Velesi'i `i he moana `uli'uli, pea to e tangitumanava `a e ngaahi Ha'a Tu'i mo e To'a `o Langi, Maama, Lolofonua pea mo Pulotu, he kuo longonoa ka e fakafoa `a e Ha'amonga `a Maui Motu'a, Fakamalu'akatea, Vailahi, Fa-ko-Fieme'a mo e Tavakefai'ana, Maka-ko- Lopua mo e Maka-hoko-valu, `Utulifuka mo Kolongahau, Sika-`a-Valu, Mala'e-ko-Pouvalu mo e Fitu-`Alofi he kanoloto `o `Upolu, pea kuo kunima fakalongo pe `a e kau Falefa `o Kauhala'uta mo Kauhalalalo `o tali fakaongo ki Ha'a Tufunga Nimatapu he Fale Toli'a ki hano fakahae'elea.
`Oku mau fakatauange kotoa pe `e lalaka `i monu `a e tataki fo'ou `a Taufa'ahau Siaosi Tupou V ki he fonua, pea ke hae'elea `e Taufa'ahau Tupou IV `a e nonga mo e fiemalie he'ene mavae aofangatuku mo e Tonga kotoa pe `i he vahaope mo e moana vavale.
Faka'apa'apa atu,
Siosiua Lafitani Tofua'ipangai
`Api ko Ma'ananga
Lo'au Research Society (LRS)
pouvalul [at] aapt [dot] net [dot] au
