'Etita,
'Oku ou kole ke u hufanga atu 'i he talamalu 'o e fonua, pea puipui ange hee mo e ha'ofanga 'eiki 'oku me'a, kae 'eiki pe mu'a 'a e Matangi Tonga 'o faka'ataa mai 'a e fanga, kau huu atu ki taulanga, na'a lava ke tala ai si 'oku fononga tu'a. 'Apee ha sola 'e tataka makatu'unga ai hato fehu'ia ko e vaka fe e 'oku vavakee mai 'i he taulanga, mou fakamolemole pe ka te si'i fakahoko atu kita, 'e 'osi 'a e tohi mo e hisitolia 'o e fonua 'oku 'ikai ma'u ai kita, 'ikai lava 'i he ako, masiva 'i 'uta pea matu'aki hala 'i 'oseni.
Kuou matafaiva pe 'i he fai faiva 'a e ngaahi ika lalahi 'o e moana, peau pehe ke u ki'i 'ohonoa atu mu'a 'i he felafoaki 'a e Lafitani 'o Kenipela pea mo e kau tahi'i toa 'o e matanga. Malie mu'a kau tangata 'a e tupe, mo'oni 'a 'eta lea Tonga, kuo mau tufi ai pe si'i mautolu fanga monumanu vaivai (hufanga atu 'i he fakatapu) 'i he fangota 'a e Lulutai.
Ne u fu'u ongo'i lahi mo'oni 'a 'eku ninimo 'i he ngaahi takainga fehu'i 'a e Kenolo mei 'Ositelelia (Siosiua Lafitani), malie 'a e fakamalanga mo e 'uhinga, ka ko e pango, pea ke fakamolemole'i ange au mahalo ko e anga ia 'ete ta'e ako, 'oku fu'u matu'aki ta'e mahino, pea fu'u matu'aki ta'e 'uhinga 'a e 'isu 'oku taukave'i mai 'e he matapule ni...ka kuou pehe ke fakahuu atu ha Tou'a ke mo fakamamaha ho'o efe, mahalo temo ki'i femahino'aki ange kimoua ai. Ko e ki'i poupou pe ia 'oku fie fai atu ai 'a e ki'i 'ohonoa, pea kataki pe 'a e ha'ofanga 'eiki ka 'i ai leva ha fakafotunga 'e 'ikai hoa pea 'ikai taau pea mo ho'o mou hoifua, mou fakamolemole'i ange au, he ko e kainanga pe moe lauvale 'o e fonua.
Faka'apa'apa atu, hoto tu'a 'eiki 'ofa atu
Sione V. Kelepi
Bigislandlove1 [at] aol [dot] com
