`Etita,
`Oku hange `oku to `a e fakamamafa `a e felafoaki ki he lahi ko ia `o e houa ngaue `a e Fale Alea `o Tonga, pea `oku hounga foki `a e fakama`ala`ala kuo fai mai `e he Tokoni Kalake `o e Fale, ka `oku te`eki pe ke fu`u tasilo `a `etau samena!
Kuo holoki `a e ngaue `a e Fale mei he `aho `e 4 ki he `aho pe `e 3, kae kake hake `a e lahi `o e houa `oku fai ai `a e feme`a`aki `a e kau memipa `i he haafe houa (miniti 30) ki he uike. Malo `a e `ofa fonua he ko e toki fu`u fai feilaulau kafakafa `oku mou fai (...
.Tuku ho`omou fakatupu lea!)
`Oku tu`utu`uni `e he Fale Alea `a `enau me`a`ilo, pea `oku `ikai ha fekau`aki ia `a e lahi `a e houa maheni `oku fakataha ai `a e Fale he `oku kei tatau aipe `a e me`a`ilo ia `oku fa`o mai he sila faka-Tu`apulelulu. Ko e pa`anga tauhi (allowance) `oku kei tu`u ma`u aipe ia pe `oku fai ha fakataha pe `ikai. Ko e toki taimi pe `oku lau ai `a e houa `i he taimi `oku nau toe fakataha ai `i tu`a `o e taimi maheni (overtime), pea lau leva ia ko e fakataha `i tu`a taimi, `oku lava ke toe tanaki atu ha toe ngaahi `aho tauhi ia `o tanaki atu `i `olunga ki he `aho `e fitu `o e uike. `Oku `ikai ke uesia `a honau tefito`i vahenga (basic salary) `o e kau memipa ia `e he lahi `o e houa `oku nau fakataha ai.
`I he`ene pehe, `oku `ikai fa`a `aonga `etau lau `a kitautolu ki he ngaahi houa he ko e fakamole ia mo e lahi `o e me`a`ilo `a e kau memipa `e kei tatau pe ia. Ko e poini `oku mahu`inga, `oku kei lava ke fakalahi `a e houa ngaue `a e Fale. `Oku totonu leva ke tau ngaue`aki `a e ngaahi houa fo`ou, mei he 9:30am ... 12:00md pea mo e 1:30pm - 4:30pm, ka tau foki ki he `aho 4. Kapau `e toe fakatatafe atu mo e miniti `e 30 `oku `ilo ti ai `a e hou`eiki memipa pea `e toe sai ange. Ko e me`a faka-Kolonia ia `a e kau Pilitania na`a nau ha`u ki Tonga!
Na`e `uhinga `a e `aho 4 mai `a e Fale Alea koe`uhi ko hono faka`atui `a e kau Memipa `o e Fakataha Tokoni ke nau fakataha mo `Ene `Afio `i he `aho Falaite. Mahalo na`a `oku sai ke kei hoko atu pe ia, pea kapau `oku fiema`u ha toe taimi lahi ange ke fakataha `a e Kapineti pea nau nofo pe ki he ho`ata Falaite. `E kei `ata pe `a e ki mu`a `a e taimi Fale Alea mo e tapuni `a e Fale he efiafi ke kei fakataha pe `a e Kapineti kapau `oku fiema`u, ko e me`a ia `oku ui ko e feilaulau. Kuo taimi ke tukutuku atu mo vahevahe `e he kau Minista `a e fatongia ki hono pule`i mo fakalele `a e ngaahi potungaue `a e Pule`anga ki he kau `ulu`i Potungaue mo honau ngaahi tokoni kuo nau fuhifuhinga kakala mei he ngaahi `univesiti, pea ke hohoa ia mo e hiki vahenga kuo fai ma`a nautolu.
Ko e me`a faka`osi `oku ou fie langa`i atu `oku `ikai ko e lahi `o e houa (quantity) ka ko e lelei mo e `aonga (quality) `o e feme`a `aki `i he Fale Alea. Mou `ofa a `o tuku atu `a e lau `o e fakatau paasipooti mo e ngaahi me`a kuo ta`u `eni `e uofulutupu `a e toumoliliu ia `a e Fale, kae `ohake ha ngaahi kaveinga `e langa ai `a hotau fonua. Tuku a `a hono fakangalikovi`i `a hotau motu, ka mou fokotu`u ha ngaahi me`a fo`ou `e langa ai `a `eni fonua pea mama fiu ai `a e kainanga `o e fonua `oku nau hohoi mo tu`amelie atu ke ma`u si`anau mo`ui mei ho`omou feme`a`aki ma`olunga `oku fai!
Teu toki hoko atu
'Ofa-ki-Tonga
ofakitonga [at] comcast [dot] net
