'Etita,
Kole mu'a ke tu'u atu e ki'i fakahoha'a ni. Ne fakaha 'e he Palemia he falealea e tohi 'a e fakafofonga Falealea ki Siapani ke ta'ofi hono fakapa'anga 'o ha fetongi 'o e MV Olovaha. 'Oku te fakame'apango'ia he fa'ahinga fakakaukau ni 'a ia te u pehe ko e siokita mo e ta'e'ofa mo'oni.
Kou mahalo he 'ikai toe faka'ilongafehu'i e fakafofonga ko eni ki ha taha. Ko e tokotaha eni 'oku 'i ai 'ene pisinisi vaka, pea ko 'ene feinga ke faka'ofa e kakai. Kuo ne fetukutuku 'ene vaka ki Fisi pea ka hoko ha palopalema ki he Olovaha 'e 'ikai toe 'i ai ha vaka.. pea 'e tuhu leva e kakai ki he pule'anga.
'Oku ne tukuaki'i 'oku lele mole 'a e Olovaha, 'io he ko e fatongia e pule'anga ke fakapapau'i 'e 'i ai e vaka ki he kakai 'o tokelau. Ko e lele 'a e Olovaha ki he ongo Niua 'oku 'ikai ha tupu ai pe to pe aa e fakamole ka ko e fatongia 'o e pule'anga. Ko e kole vaka ki Siapani ne fakaha 'e he Palemia 'oku 'ikai ko ha no ka ko e tokoni (grant) 'a Siapani.
'Oua 'e to'o hala 'a e fe'auhi'auhi pea mo e ngaue (service) 'oku fakahoko 'e he pule'anga ma'ae kakai. Ne ha pe eni he paloti 'i Falealea, ne loto kotoa e falee ke hoko atu e kole 'a e pule'anga ki Siapani. Ko e me'a pe 'oku mahino mai ne 'ikai 'ilo 'e he tokotaha na'a ne fai e tohi ko Siapani koe fonua poto kuopau ke foki e me'a kotoa ki he tu'unga 'o e va mo e tauhi vaha'a ngatea 'a e ongo fonua.
Kole atu ko 'ete fai ha ngaue ke langa fonua kae 'oua 'e tamate'i e fonua. Mou feinga atu na'a lava ke holo e totongi vakaa.
faka'apa'apa atu,
Pola Loiti
polaloiti [at] yahoo [dot] co [dot] nz
