You are here

Talanga 'i he lea faka-Tonga

'Otua mo Tonga ko hoku Tofi'a

USA

‘Etita,

Tuku pe mu’a ke ‘oatu ‘a e ki’i fakamalo ko ‘eni’ ki he tangata ko Siosaia Fatani. Malo ‘aupito e fie fanongo mai pea ‘ofa pe na’e ‘ikai ha lea ‘e ongo faka’aluma atu ‘i he fie tokoni na’e fai atu’. ‘Oku mo’oni ‘aupito ‘a e me’a na’ake lave ki ai “Honesty is the best policy”, pea ‘oku mahino pe kiate au ‘a e ‘uhinga na’ake loto mamahi ai. ‘Oku mahino foki na’e ‘ikai ha loto taaufehi’a pe tukuaki’i hala (kovi) ‘o ha taha. Na’e lea e tangata fa’u tohi ko Mr Carlson “Don’t Sweat the Small Staff” (‘Oua ‘e pupuha’ia he me’a iiki’) ‘oku ‘uhinga ia ke ‘oua ‘e maumau (pe faingata’ia) e loto ‘i ha fu’u taimi lahi ‘i he fanga ki’i me’a iiki.

Siosaia, Malo ‘aupito e manatu ki he ngaahi akonaki he ‘oku ha mai pe ‘i he founga talanoa kuo ke tuku mai ke fai ki ai ha “felafoaki”. Ko ‘eku ngaue ‘i he

‘aho kotoa pe ko e tokoni ‘i he taimi ‘oku fai ai ‘a e ta’efemahino’aki ‘i he

vaha’a ‘o e kakai, matakali pe fakafo’ituitui pea ki he kau ngaue ki he kakai.

‘Oku ou toe ma’u moe faingamalie ke faifatongia fakapulipuli ‘i hono malu’i e

ngaahi teuaki pe lamalama faka’ohovale pe fakatu’upakee ‘oku tukulotoa ke

fakahoko ha maumau ‘e ha fakafo’ituitui pe fa’ahinga kakai ki he kau pasese pe

falukunga kakai lolotonga ‘enau fefolau’aki ‘i he ngaahi Vakapuna ‘i he

vahefonua ‘e 51 ‘o ‘Amelika’, pea ko hono ‘uhinga ia ne u fie tokoni atu ai ki

ho’o fiema’u’. Kataki pe na’a ngali kuo fai ha sanitungua ka ko e fie tokoni pe

‘i he ngaahi pootalanoa ‘oku fai he ‘oku fai e fatongia ki he FAA Federal

Avaition Administration (FFDO, FAM, GSC, CRO) ma’ae fonua ne fai mai ki ai e

kumi mo’ui’.

‘Oku ou kole fakamolemole atu ki he kau fevahevahe’aki kuo fai e fetu’utaki

neongo ‘ene hange ha langatoi e talanoa fetohi’aki pe kae ‘ikai ha fesiofaki.

Na’e kamata ‘a ‘eku feohi he loki talanoa ‘o e Matangi Tonga pea kuo ki’i

fuofuoloa mai he na’aku manako ke lau e ngaahi ongoongo pea mo poolave mo e

fanga tokoua mo e kau fefine mei he vahaope’. Ko e taimi lahi ne fai e fetoo’aki

he na’e lahi ange ‘a e hua (JOKE) faka-faikava (patipati pe kosikosi talanoa)

pea hange na’e ‘ikai ongo tonu ki he ni’ihi, koia ‘oku ou fakamalo lahi atu ki

he talavou ko Siosaia Fatani ko e talanoa lelei kuo ne tuku mai ki he taalanga

‘anga’.

‘Oku ou fakamalo atu kia kinautolu kuo nau tohi mai ‘o fakalotolahi pea pehe

foki kia kinautolu ‘oku lotomamahi ‘i he ‘eku founga talanoa’. ‘Oku ‘ata’ pe

foki ‘eku puha meili (email) keke talanoa mai mo lau mai kapau ‘oku ke

lolomamahi ‘i ha fa’ahinga fakafotunga.

Manatu’i ma’u pe ‘a e moto hotau ki’i fonua ‘oku tau laukau ‘aki’ “Ko e ‘Otua mo Tonga ko hoku Tofi’a” ‘i hono ‘omai e fakakaukau kihe fakafotunga ‘oku fai ‘i he ‘etau pootalanoa, ‘oku ‘uhinga ia ‘oku tatau pe ‘etau ‘ofa ki he ‘Otua mo ‘etau ‘ofa ki Tonga’, pea kapau ‘oku ‘ikai taau ketau takuanoa ‘e ‘Otua pea taa ‘oku totonu ke ‘oua tetau lau’i kovi’i hotau ‘ofa’anga’ (Tonga). Ka ‘oku ‘i ai hao mamahi fetu’utaki pe ki he kakai ‘oku nau fai e palopalema ‘oua ‘e hiki hake hotau ki’i fonua ke fulifulihi ‘i e ngalu’ea’.

Malo e ‘ofa fonua

Siosaia Moimoiangaha

LAX [dot] RAC [dot] Room [at] AlaskaAir [dot] com