Pule'anga 'o Tonga
'Ofisi 'o e Palemia
Fanongonongo Lakanga ‘Ataa: Komisiona ‘o e Ngaahi ‘Api Popula
(Fakatatau ki he Kupu Si’i 4 ‘o e Lao ki he Ngaahi ‘Api Popula)
‘Oku fakaafe atu ki he kakai ‘o e Fonua ke fai mai ha tohi tala ngaue ki he lakanga oku ‘ataa ‘i he Potungaue ki he Ngaahi ‘Api Popula ‘a Tonga: Ko e Komisiona ki he Ngaahi ‘Api Popula.
Ko e Potungaue ki he Ngaahi ‘Api Popula ‘a Tonga (“Pilisone”), ko e taha pe ia ‘o e ngaahi pou tuliki ‘o e Fakamaau’anga ki hono fakatonutonu ‘o e kau fai hia. ‘Oku fatongia’aki ‘e he Pilisone hono malu’i ‘o e komiuniti mo tokoni ke ta’ofi ‘a e fai hia ‘aki ha tauhi ‘oku taau mo e ngeia ‘o e tangata, tokanga’i mo liuanga ‘o kinautolu kuo tautea’i ‘e he fakamaau’anga kiha vaha’a taimi.
‘E taliui ‘a e Komisiona ki he Ngaahi ‘Api Popula (“Komisiona”) ki he Minisita ki hono fa’u ‘o e ngaahi fokotu’utu’u fakangaue mahu’inga, fakahoko ‘o e ngaahi tu’utu’uni mo e founga ngaue ‘a e Pule’anga, malu mo hono pule’i ‘o e Pilisone, mo e tauhi malu pea mo e lelei ‘a e katoa o e kau popula ‘i he ngaahi ‘api popula.
Taimi ‘oku Fakanofo ki ai:
- ‘E ‘ikai laka hake he ta’u ‘e 3 pea ‘e ngofua ke toe fakanofo kiha vaha’a taimi pe ‘e taha.
Tu’unga Vahenga:
- Band F ($47,695 - $71,542).
Pōto’i Ngaue ‘oku Maatu’aki Fiema’u:
- Faitotonu, fetu’utaki lelei ‘i he tohi mo e lea ‘i he lea fakapalangi mo e faka-Tonga, pea taukei ‘i he fakahinohino mo e fakafeauloto.
- Mahino’i lelei ‘a e Lao ‘o Tonga ‘oku felave’i mo e Fatongia ‘o e Pilisone pea pehe ki he Fakamaau’anga mo e founga fakatonutonu ‘o e kau fai hia.
- Mahino’i lelei ‘a e tefito’i mo’oni ki he liunga, fakalotosi’i ‘o e fai hia, totongi tuha ‘o e fai hala mo e fakaakeake ‘o e tonuhia, felave’i mo e fatongia fakatonutonu anga ‘o e Pilisone.
- Poto’i mapule’i ‘o e taimi faingata’a fekau’aki mo e ngaahi me’a fakatu’utamaki ki he malu ‘a e Fonua, ngaahi faingata’a fakanatula, mo e mahaki faka’auha ki he mo’ui.
Taukei Ngaue mo e Tu’unga Fakaako
Ha mata’itohi oku kaunga tonu + poto’i tuhani ‘o e ngaahi fiema’u, poto’i fakahoko mo e poto’i fakataki ngaue fakamatu’otu’a ‘i he ngaue faka-Pilisone, Polisi Tonga pe Tamate Afi mo e Ngaahi Me’a Fakafokifa:
- PHD + ta’u ‘e 4;
- MA + ta’u ‘e 6; pe
- PG Dip. pe BA + ta’u ‘e 10.
Founga ‘o e Tohi Kole
Ko e tokotaha kole ngaue kotoa pe, kuo pau ke ‘omai ‘ene tohi kole, CV, tohi fakamo’oni ‘o ‘ene poto’i ngaue ‘e 02, tohi fakaongoongolelei ‘e 02, tatau ‘o e ngaahi tohi fakamo’oni ako kuo fakamo’oni’i fakalao, lekooti fakapolisi mo e ha toe tohi kehe ‘e ‘aonga ke poupou ki he tohi tala ngaue. ‘E toki kau pe ho’o tohi tala ngaue he lau, ‘o kapau ‘e kakato mai ‘a e ngaahi me’a ‘oku fiema’u. Ko e ngaahi me’a kehe felave’i mo e lakanga ni, ‘e toki ‘oange pe kiate kinautolu ‘e ui ke kau he faka’eke’eke ki he lakanga ni.
Ko ha toe faka’eke’eke, mo kinautolu kotoa pe ‘e tohi mai, ‘e ‘omai ‘oua toe tomui ange ‘i he taimi 4:30 efiafi ‘o e ‘aho Pulelulu, 28 ‘o Me, 2025 ki he tu’asila ko ‘eni:
Tu’asila
Sekelitali Pule & Sekelitali ki he Kapineti
‘Ofisi ‘o e Palemia
Fungavaka 4, Fale Fakapule’anga Sangato Siaosi i
NUKU’ALOFA
Telefoni
‘Ofisi Palemia 7401352 pe 7401362
--