Tonga ee tu'u 'o tue [1]
Monday, August 20, 2007 - 17:58. Updated on Sunday, June 15, 2014 - 20:03.
'Alo mai 'Alo mai he kuo Tonga e Matangi.
Kuo tofa e Katea, pasika mo hono Hama.
Maau e ngaahi Fohe.
Tonga ee tu'u 'o Tue.
Kuo maau e Timi 'a e Tu'i Tonga ke fakafofonga'i 'a Tonga 'i he Sipoti 'a e Pasifiki Tonga 'a ia 'e kamata he 'aho 25 'o 'Akosi pea toki 'osi ki he 'aho 8 'o Sepitema. Ko e fe'auhi 'a e Siu'a'alo e toki kamata ia he 'aho 3 'o Sepitema 'o toki 'osi 'i he 'aho 6 'o Sepitema.
'Oku fe'unga 'a e kau folau 'a e Tu'i Tonga moe toko hongofulu. Ko faifekau Tevita Kilifi Heimuli 'oku ne tataki e folau 'a e Tu'i Tonga 'o kau ai mo e ongo Official 'e ua 'a ia ko Karen Fonua pea mo Sarah Cooper Finau.
Ko e timi leva 'eni 'a e Tu'i Tonga:
1. Daleki Finau (Captain)
2. Kisione Fonua
3. William Fonua
4. Mosese Tuitakau
5. 'Epeli Prescott
6. Setaleki Funaki
7. Owen 'Ofa kimuli Pau'u
Ko e ngaahi fe'auhi kehekehe 'e nima 'e kau atu ki ai 'a e Tu'i Tonga 'a ia ko e lova tautau toko ono 'e Tolu (3) mo e lova tautau toko taha 'e Ua (2). Ko e ongo lova tautau tokotaha 'e fakahoko ia 'e Daleki Finau (500 meters Sprint) pea mo Owen Pau'u (15 kilometers, Marathon) pea te na toe kau atu pe ki he ngaahi lova tautau toko ono.
Ko e mahina 'eni 'e fa 'a e teuteu 'a e timi pea pehe kihe 'e nau kau atu ki he ngaahi fe'auhi fakafonua 'a Nu'usila ni pea mo e ngaahi fea'uhi fakavahe 'a e vahe 'Okalani. Neongo e momoko toho 'a Nu'usila ni he ngaahi 'aho ni, ka ne kei lava pe 'a e fanau siu'a'alo 'o fakahoko 'e nau ngaahi polokalama fakamalohi sino 'i he efiafi mo e pongipongi. Ko e taumu'a ia 'a e timi ke fai homau lelei taha pea ke ikuna foki ma'ae Tonga kotoa.
Ko e me'a fakafiefia mo fakalotolahi foki ki he fanau 'a'alo 'a e a'u tonu mai Ric Sinisa, mei he Sinisa Law, 'one foaki mai 'ene tokoni ($1,000NZ) ki he timi pehe ki he 'ene ngaahi lea fakaloto lahi ki he fanau siu'a'alo. Ko Ric foki ne kau ia he 'uluaki timi siu'a'alo 'a Tonga ne kau atu ki he South Pacific Games ne fai ki Fisi 'i he 2003.
'Oku oatu heni 'a e fakamalo lotohounga mo'oni meia Owen Pau'u pehe ki he faifekau Kilifi Heimuli mo e fanau Siu'a'alo kotoa, ki he kainga Tonga kotoa pe ne mou tali e ngaahi fakatangi fakaseniti 'a e fanau ne fai atu he ngaahi mahina kuo liu atu. 'Oku toe 'oatu heni 'a e fakamalo mavahe mo'oni ki he ngaahi kautaha Pisinisi ko'eni 'i he 'enau loto fie tokoni 'o "Sponsor" 'a e Tui Tonga:
- C'pella Pacific
- Sinisa Law
- T News
- To'utupu Tonga Trust
- Koloto and Associates
- Ethnic Communications
Timi Tu'i Tonga, 20/08/07.