Editor,

PLEASE extend our deepest condolences from the Fofo'anga Club of American Samoa and the Tongan Community of American Samoa to Princess Mele Siu'ilikutapu Kalaniuvalu Fotofili and her family.

'Oku ou kole ki he Matangi Tonga ke fakafolau atu mu'a mei he 'Otu Mo'unga Tu'asivitasi pea 'i he peau fasi 'o e Pasifiki 'a e fakatapu ki he tu'unga kotoa 'i Tonga 'oku totonu ke fakatapua, kae 'ata ki he motu'a tu'a ko'eni ke lafolalo atu e popoaki fie kaungamamahi tu'a ko'eni mei he motu maka 'o e Tu'i Manu'a

Ko e hisitolia mahu'inga 'e 'ikai ngalo he'eku mo'ui na'e hoko ia lolotonga 'eku faifatongia ki he La'a kuo unga fonua, 'a hotau Tu'i 'Ofeina ko Taufa'ahau Tupou IV 'i he'ene ha'ele faka'osi mai ki Amerika Samoa.

'I he faingamalie mahu'inga 'e taha na'ama tokoua pe he loki na'e 'afio ai pea ne to fololofola ko 'ene fakatokanga mai ki he motu'a tu'ani 'a e tu'unga 'oku 'I ai 'eku mo'ui fakasino 'o fakatatau ki hoku ta'u motu'a.

'I he faka'osi 'anga 'ene to fofofola na'aku fakatokanga'i e ha mai mei hono fofonga e fakamatoato mo'oni mo e laumalie neu ongo'i teteki 'o 'ikai ko e ilifia ka 'oku hange 'oku ha'u ha fu'u ongo faka'ofa'ia lahi kia au 'o hange 'oku pehe mai 'e taha ko hoku faka'osi faingamalie 'eni mohoku Tu'i 'Ofeina.

Pea to folofola mai leva e Tama Tu'i ki au 'o pehe, "Mafi, ko e palani 'a e 'Otua ki he mamani ko'eni ke hanga 'e kimoutolu fanau 'o tanu kimautolu matu'a . . ." pea fakalongolongo ai e Tama Tu'i ha meimei miniti e taha pea kae lele noa pe hoku lo'imata he'eku fakatokanga'i atu e lo'imata'ia 'a e Tama Tu'i, pea ne toki faka'osi mai, ". . . Ko e mate ia kuo pau, ka 'oku 'ikai ha toe me'a 'e fakamamahi ange ki ha tamai mo ha fa'e ka ko'ena toe tanu ha'ana fanau''. Ne u mantu'i leva he momeniti koia ko e toki 'osi pe ia e me'afaka'eiki 'o Pilinisi Ma'atu pea fai mai e ha'ele.

'Oku 'ikai ko ha feinga ke tatau ka ko e toe fakamo'oni ki he folofola 'a e Tama Tu'i he ko e talu e malolo hoku ki'i tehina he 1966 'oku a'u ki he 'ahoni ko e fakataha kotoa mo 'eku ongomatu'a 'oku pau ai pe ke fai 'ena manatu lo'imata ki Telekava mo e 'ena pehe, "na'e si'i mei fefe nai kapau na'e si'i kei mo'ui a Viliami 'Unga"

Ta'ahine Pilinisesi Si'uilikutapu Fotofili, 'oku ou ongo'i mo'oni e faingata'a'ia ho'o mavae mo ho'o tama. 'Oku piki nima mo laumalie taha e Kalapu Fofo'anga 'o Amerika Samoa mo e Community Tonga mo e tautapa 'i he loto ma'ulalo mo'oni ki he Tu'i 'o e Langi ke takaofi atu mo'ene nonga lolotonga e taimi faingata'ani.

Ne tau toki situ'a mei hono fakamanatu e Pekia 'i he ilifia e Kau Akonga 'i he'enau ongo'i 'oku 'I ai e me'a lahi 'e hoko. Na'e afio'i 'e Sisu kuo vave 'enau mavae. Pea ne tala ki h'ene Kau Ako, 'Oua temou mamahi, he kuo pau ke tau mavae, ka 'I ha ki'i taimi si'i, pea ne palomesi ai kia kinautolu 'o pehe te nau toe fakataha pe ki he 'api 'e ha'ele 'o teuteu ma'a kinautolu, ko e 'apini 'e tu'u ia 'i he kolo 'o 'ene Tamai pea ko e kolo ia 'oku ko Hevani.

Ko e palomesi ko'eni 'a e Fakamo'ui kuo toe fakapapau'i mai 'e he kau Palofita 'o e ngaahi 'aho kimuini 'oku tau kau kiai mo kitautolu. Pea kuo 'osi 'omai e founga ke mou toe fakataha ai mo ho'omou fanau 'i he maama kaha'u.

'I he loto ma'ulalo mo e fie kaungamamahi mo'oni.

Sione Lousiale Kava

HMHC Mafi 'o Amerika Samoa

slkava [at] hotmail [dot] com ( slkava [at] hotmail [dot] com)