Koeha 'oku feinga mai ki ai a Pilitania mo e NATO [1]
Thursday, July 29, 2010 - 14:45. Updated on Monday, September 9, 2013 - 18:40.
'Etita,
'OKU 'ikai ke u tui ko e fakakaukau lelei 'a e kau atu 'a e kau Sotia Tonga ki he ngaue fakamelino 'i Afghanistan, koe'uhi he 'oku ma'u ai 'a e tupu faka'ekonomika ki he fonua.
'Oku ou tui pe ki he fakakaukau 'o e pukepuke 'o e melino mo e tau'ataina 'a e kakai 'o e fonua koeni. Ka ko e me'a pe ke tau fakatokanga'i 'oku kehe 'aupito 'a e tau ia 'oku fai 'i Afghanistan pea mo ha toe fa'ahinga tau kuo fai 'i he mamani koeni. He ko hono mo'oni , 'oku 'ikai sio ha taha ia ki he fili. 'A ia, 'oku malava pe ke te nofo mo mohe fakataha pe mo e fili 'o 'ikai ke fai ha fe'ilongaki ia.
Ko 'eku fifili pe koeha 'oku 'ikai ma'u ai ha kau sotia mei he ngaahi fonua 'oku laui miliona hono kakai, pea laui kilu 'enau kau sotia. Kae feinga mai 'a Pilitania Lahi pea mo e NATO ke 'ave 'a e ki'i kau sotia 'oku 'ikai ke a'u ki he toko 1000 hono tokolahi, mei he ki'i fonua 'oku toko tahakilu pe hono tokolahi 'o e kakai.
Ngalingali na'a 'oku 'ikai ke kei ma'u ha kau sotia ia 'i he ngaahi fonua lalahi 'o mamani ke nau fai 'a e ngaue koeni.
'Oku 'osi mahino foki 'a e vahenga mo e life insurance koia 'oku 'omai 'ehe NATO. Pea kuo mahino 'a e tukupaa 'ae fanau sotia ke nau fakahoko 'a e fatongia.
Ko e fehu'i leva , "Pe koehaa 'a e tukupaa 'a e Fonua mo e Pule'anga ka faifai ange 'oku pekia ha taha 'o e kau sotia ?"
'I he ngaahi fonua 'e ni'ihi, 'oku nau fa'a foaki 'a e ngaahi metali fakalangilangi ke fakahounga'i 'aki 'a e tukupaa mo e mateaki'i fonua kuo fai 'e he kau sotia kuo pekia.
Kaekehe, 'oku ou fokotu'u atu ke fai 'e he Fonua mo e Pule'anga Tonga ha tukupaa ki hano fakalangilangi'i 'o ha sotia 'e pekia, 'aki hano tauhi 'o e ngaahi family 'o ha sotia 'e pekia/disable/mentally disorder 'o pehe ni:
- Ke hanga 'e he Pule'anga 'o 'oange ha vahenga pe pension ma'ae uitou mo e fanau.
- Ke totongi 'e he Pule'anga 'a e fakamole kotoa ki hono ako'i 'o e fanau 'o a'u ki he'ene lava lelei
- Ke foaki ange mo ha konga 'api kolo, pea langa kiai ha fale loki mohe 'e 2, falekaukau mo e toilet, peito mo e sima vai.
Ko e 'uhinga 'o e fokotu'u 'oku fai atu 'i 'olunga, ko 'etau hanga ia 'o fakamahino ki he NATO pea mo e ngaahi Pule'anga Lalahi 'o mamani 'a e ngaahi tefito'i me'a lalahi koeni;
- 'Oku tau tali lelei ke tau poupou mo kau atu ki he ngaue fakamelino koeni
- 'Oku tau mateuteu ke tali 'a e ngaahi ha'aha'a mo e palopalema ka hoko mai lolotonga 'ae fakahoko fatongia koeni.
Neongo pe 'e 'ikai ke 'I ai ha sotia 'e pekia, ka 'oku mahu'inga ke tu'u pe 'a e lao moe poupou, he 'oku 'ikai ke fe'unga 'a e vahenga mo e life insurance 'oku 'oange ma'ae ngaahi family ke fai 'aki honau tauhi, 'i ha hoko mai ha fakatamaki.
'Ofa lahi atu ki he mata 'o e si'i kau sotia kuo nau tukupa 'enau mo'ui ki he fatongia ni. Fakatauange ki he 'Otua Mafimafi ke ne fai tapuekina kimoutolu, kae'uma'a si'omou ngaahi famili.
Faka'apa'apa atu,
Paula K. Kava
paul [dot] kava [at] gmail [dot] com