'Etita,

MALO e faifatongia mai mei ho tau ki'i fonua kae ki'i hao atu e ki'i tali nounou ki he poini 'oku 'ohake 'e Paula Kava. Ko e ki'i fakatonutonu leka pe ki he taumu'a 'ene tohi 'o pehe koeha me'a 'oku feinga mai ki ai 'a Pilitania mo e NATO? 'Oku 'i ai 'a e tui 'a e motu'a ni 'oku 'ikai ke pehe mai 'e Pilitania mo e NATO koha fo'i piini piko 'a e kau ange 'a Tonga ki he tau, ka ko e 'ohokui atu 'a e kau ma'u mafai 'oku nau fakangofua 'a 'etau fanau taumalu'i fonua ke nau fakakaungatamaki 'i he vavatau 'oku fai 'i Efikanisitani. Poupou kihe me'a 'oku lave ki ai 'a Paula Kava. Ka ko e pango kuo matame'ahamai 'a e kau paipa 'oku nau ma'u mafai 'i he me'a ni 'i ha mohe misi mo e kau taki 'i he sotia ki ha momona 'e ma'u mei he vai'omo mo e fakahekeheke ki Pilitania mo e NATO 'oku fai.

Pea 'e faingata'a'ia 'a e kau paipa ni hano kole atu ha fa'ahinga penefiti ki Pilitania mo e NATO kapau 'e hoko ha me'a ki he si'i fa'ahinga 'oku nau tataki atu ki Afikanisitani ke fakakakato 'a e fietonu 'oku fai. He'e pehe mai 'a Pilitania mo e NATO mou ha'u pe 'i ho'omou fakamole pe 'akimoutolu na'e 'ikai ke mau kole atu kemou ha'u. Ko e fu'u teuaki fakapo 'eni 'oku lahi 'o hange ko ha taki atu ha fu'u tuli pea toe noa kihe fe'auhi tipeiti. Ko 'enau si'i sio ngutu pe ki he ngaahi me'a 'oku fai 'i he ngaahi fonua kuo nau taukei 'i he mala'e 'o e tau taau pe ko 'enau o atu pe 'o le'o 'i he ngaahi 'apitanga tau kae 'ikai ke nau 'otumu'a 'i he laine. Tau ki'i fakafua pe ka ko kitautolu 'eni 'oku teke'i atu ki he mala'e 'o e tau, mo e ki'i mahino 'oku tau ma'u, pea mo'oni ai 'a e lau 'a e kau kiti, Me'a fana 'ene hiki . . .

Ki he tangata'eiki Pilikatia ko koe 'oku totonu keke ongo'iange 'a ho'o kau sotia 'i ha toe taha 'i he kau paipa keke 'eke 'a e ngaahi me'a ko'eni 'oku lave ki ai 'a Paula Kava kimu'a pea ke toki fakangofua kau sotia ko'eni 'oku nau lototo'a ke fakafofonga hotau fonua 'i he tau 'oku 'ikai ke 'i ai ha'atau kaunga ki ai. Na'e mei ngali sai ange kapau ne 'osi e tau pea tau toki o atu 'o tokoni ki hono fakama'a e fonua kaikehe ifo e kai lu sipi 'i Tonga na mo mohe mafana kae si'i tau 'etau kau sotia Tonga mo e faingata'a'ia. 'Eke atu ki he ngaahi fa'e, mali, fangatokoua/tuofafine, foha mo e ofefine 'o e kau sotia pe 'oku ifo 'enau mohe 'i he po'uli 'i he 'enau fakakaukau atu ki honau 'ofa'anga 'i he mala'e 'o e tau pe koeha 'enau tali, tukua e fu'u me'a ko ia koe koloa 'a Tonga 'a e fakamalo he'e mo'oni ai e lau 'a Tinitini 'i he koniseti 'a Pangaimotua. "Seniale 'e a'u hoku fo'i poti 'o'oku ki he motivi 'i he lahi ho'o holi".

Tau fakatauange pe 'i he kaha'u ke fai ha fili fakapotopoto 'i hono ngaue'aki 'o 'etau kau sotia 'i he ngaahi me'a 'oku 'ikai ke fu'u 'aonga ke nau kau ai. 'Ai foki ke kei hokohoko atu 'a e 'Otu motu anga 'ofa ka 'oku 'ikai ko e 'Otumotu 'ohonoa, ki'i fakama'uma'u hifo na'a fai 'etau 'ohonoa pea fakatokanga'i kitautolu pea kau kovi ki hotau ki'i fonua fakalukufua. Malo Paula Kava ho'o 'ohake 'a e me'a he 'oku fu'u mahu'inga 'aupito ki he kau sotia mo honau ngaahi famili takitaha pehe kihe fonua fakalukufua.

Faka'apa'apa atu.

Lou 'Uhila

louuhila [at] gmail [dot] com ( louuhila [at] gmail [dot] com)