'Etita,
'OKU fu'u malie 'aupito 'ete fanongo ki he tipeiti malie 'a e kau taki hotau fonua ni 'i hono fakatautau hotau vaka ki he taulanga fo'ou koia 'oku teu ke tau tu'uta kiai 'i Novema 2010. He 'oku hange ha mahanga lei 'a e lava me'a 'a e kau fakafofonga 'o e hou'eiki nopele pea mo e kau fakafofonga 'o e kakai, pea toe 'amo ange 'a e hou'eiki memipa 'o e kapineti.

Ka ne si'i hanu vavale mai ha ki'i motu'a toutai, 'i he'ene toki mahino kiate ia ta ko e mokohunu, lomu, huhuvalu, te'epupulu mo e ngaahi fingota koia he famili koeni - 'oku ma'u ai 'a e fu'u pa'anga lahi 'au'aupito 'i hono 'ave ki he maketi 'i 'Esia.

Talamai 'e he motu'a, na'a ne fu'u fiefia 'aupito 'i hono toe faka'ataa koia ke toe fangota'i mo tufi 'a e fa'ahinga fingota koeni, hili ha ngaahi ta'u lahi hono ta'ofi.

Pea na'a ne fakamalo lahi 'aupito ki he kau minisitaa, kau fakafofonga nopele mo e kau fakafofonga 'o e kakai - 'i he'ena fuhu'i malohi mo e vili ta'e'unua ke kei hokohoko atu pe hono fangota'i mo tufi 'a e fa'ahinga fingota koeni, neongo kuo 'osi ngata 'a e quota na'e tuku mai 'e he toutai.

Taa koaa, ko e konga eni ia 'o e teu teu ki he liliu, ko e fakatau kane tasipini mai 'a e ngaahi fingota ni mei he kau toutai – 'o nau toki fakatau fua kilo (kg) atu kinautolu ki he maketi ki 'Esia.

He ko hono tufi 'o e te'epupulu – kuo pau ke 'uluaki fakangakau (hufanga he fakatapu) 'a e te'epupulu pea toki fua. Pea 'oku fakafuofuoa ki he fo'i te'epupulu ('inisi 'e 6 ki he 8) 'e 200+ ki he kane 'e 1. Pea kuo pau ke tufi ha kane 'e 3 ki he 4 'o fakangakau ke lava ai ke fonu 'a e kane tasipini 'e 1 – koe'uhi 'oku mingi 'a e te'epupulu ia hili hono fakangakau .
'Oku fakafuofua ko e fo'i te'epupulu 'e 600+ kuo 'osi fakangakau , pea toki fonu 'a e kane tasipini lita 'e 20 'e 1. (20 litre pail). Pea ko hono totongi 'o e kane 'e 1 kuo 'osi fakangakau koe $20.00.

Pea toki pehee 'e he motu'a, na'a ku 'amanaki kuo tau monu'ia he hu mai 'a e kau taki hotau fonua 'o kau 'i hono fakamaketi 'o e ngaahi fingota 'o ngatai – 'o fakatatau ki he ngaahi tefito'i mo'oni fakapolitikale koia 'oku nau fa'a tu'uaki, 'a e faa'i kavei koula pea mo e liliu fakatemokalati. Kae taa koaa, ko e taimi pe 'oku 'asi ai 'a e tola, kuo nau 'oho kai kinautolu 'o hange ha ngaahi fu'u 'ulua.

Ko e hau he faka'ofa 'a e si'i mokosia 'a e si'i kau toutai 'i hono fai 'o e fangota ni – he ko e fu'u taimi momoko 'eni. Pea 'oku lelei ange 'a e ola 'o e toutai 'i he taimi 'oku tahi po'uli ai , tautautefito ki he tahi hengihengi. Pea kuo pau ke 'alu 'a e ongo matu'a mo e si'i ki'i fanau 'o tufi, koe'uhi ke lava 'o ma'u ha kane 'e 1.

Kaekehe, kapau ko e anga eni 'o e fakafotunga 'o e kau taki he taimi ni , 'e fefee nai 'a e taimi koia te nau hoko atu ai ki he liliu?

Ngalingali na'a kuo pehee 'e he kau taki 'o e lolotonga ni ke nau 'aliaki faka'osi ai leva kinautolu he fua mokohunu 'o e ta'u ni, koe'uhi he 'ikai te nau toe kau kinautolu he fili ki he pule'anga fo'ou.

Faka'apa'apa atu

Paula K. Kava

paul [dot] kava [at] gmail [dot] com ( paul [dot] kava [at] gmail [dot] com)