'Etita,

'OKU ou kole ke u fakatulou atu mo e Talamalu 'o e Fonua, talangata 'iate au 'o fai ki tu'a, kae 'ataa ke fakahoko atu 'a e ki'i tohi ni.

Na'aku 'ohovale 'aupito 'i he longoa'a 'o fekau'aki mo e 'api ko 'Atalanga. Peau pehe ke 'oatu pe mu'a 'eku ki'i ma'u ke kau he laau lea fekau'aki mo e 'api ni.

Na'aku kau 'i he fanau fefine na'e monu'ia 'o 'ave he ngaahi scholarship 'a e Pule'anga, Ngaahi Poate, etc. 'o ako 'i Nu'u Sila. Na'e mahino kia tekimautolu ko e 'api 'oku mau 'alu 'o nofo ai ko e 'api ia 'o e Ta'ahine Kuini kuo ungafonua.

Na'a ne finengalo ke langa 'a e ki'i fale na'e 'uluaki loki fa ke nofo ai 'a e fanau koeni, ko 'ene finangalo ke ofi ange pe 'a e fanau fefine ki he fale 'oku ne 'afio ai, neongo na'ane 'afio fakataimi pe ai. Na'e 'i ai 'a e 'api 'e taha ko Va'epopua na'e kumi 'ehe Pule'anga ke 'i ai 'a e fanau tangata. Na'e vela 'a e 'api koeni pea toe kumi 'a e 'api 'e taha 'o ofi mai, mahalo ko e block 'e taha ki 'Atalanga ke hiki mai ki ai 'a e fanau tangata. Na'e toki toe langa 'a e fale 'o e fanau tangata 'i 'Atalanga 'i he ngaahi ta'u mai ki mui.

Talu 'emau lele atu ki Nu'u Sila mo 'ene mahino pe ko e 'afio'anga ia 'o e Kuini 'o Tonga pea ko hono 'api. 'I he 'ene finangalo 'ofa pea mo 'ene fie fakahoko hono fatongia ko e Fehuhu 'a e 'Otu Tonga, na'e finangalo ai ke ofi ange pe 'a e fanau fefine. Na'a mau koloa'ia 'aupito he na'e fai hono akonekina kimautolu mo e talatalaifale, to totonu mei he Ta'ahine Kuini. Na'a mau ongo'i 'a e tauhi 'e he Ta'ahine hono va pea mo kimautolu, kainanga 'o e fonua. Ko e taimi na'e fai ai 'a e talatalaifale, ko hono fakahoko atu pe ha hingoa 'o ha taha kapau 'oku 'ikai ke ne 'afio'i hingoa 'ete ongo matu'a 'oku ne 'afio'i 'ete ongo kui, mo e feitu'u 'oku te lele mei ai. Mo'oni e lea 'a e kau papalangi "it was an awesome experience!", he'ete lave'i ko e fu'u Kuini 'o Tonga 'oku ne 'afio'i kita mo hoto tupu'anga. Ko e holo 'a hono kakai ki he 'Ene 'Afio, na'a mau lave monu ai. Na'a ne to folofola ai, 'a e mokoi hono finangalo kihe fanau ako fefine 'o 'Atalanga 'i he taimi 'oku nau foki ai ki Tonga 'oku nau molumalu 'i he teunga mo e 'ulungaanga, ko e 'uhinga eni he koia tonu na'a ne fai 'a e akonekina 'o e fanau ni.

Ko e me'a 'oku ou lave ki ai 'i 'olunga, ko ha'aku ia ma'u mo 'eku manatu melie ki he kuohili. 'Oku mahino pe kiate au ko e kuonga poto eni 'o Tonga, pea 'oku 'ikai toe ufi 'a e taki taha ta'aki (hufanga he fakatapu) 'ene mo'oni. Kau 'oatu mu'a ha ki'i fakamanatu: Na'e ufi, faka'apa'apa pea toka'i pe 'a e Tonga ia he kuo hili, pea ko e kuonga koula ia 'o Tonga! 'Oku hanga 'e he kuonga poto ni 'o 'ave ki tautolu ki he tu'unga 'oku ma'olunga 'aupito he 'oku lilika hoku poko'i mata tu'a he tau mama'o 'etau kaka. Ka ko e ma'olunga ange 'etau kaka ko 'ene 'osi ia 'ae fanga ki'i me'a 'oku kuku ke fai 'aki e fononga he'ene ngangana!

'Oku ou fie 'oatu 'a e talamonu ki he teu fili 'oku 'amanaki ke fakahoko. Fakatauange ke tataki 'a 'etau Tamai 'Otua 'i he ngaue mahu'inga ni.

Tu'a 'ofa atu,

Leafa

ltaumoepeau [at] co [dot] sanmateo [dot] ca [dot] us ( ltaumoepeau [at] co [dot] sanmateo [dot] ca [dot] us)