'Etita,

'Oku ou fakamalo atu kia Lou 'Uhila he'ene tafulu pongipongia mai he vahaope. Kataki ko e me'a 'oku ke hoha'a kiai 'oku ou tau'ataina pe au ke fakahoko 'o tatau pe mo ho'o tau'ataina keke tafulu mai he kolomu ni. He 'ikai ke u toe mole taimi he fakakikihi mo koe he ko e kaveinga ni 'oku fai kiai 'a e ngaue fakalao pea koeha hono ola pea 'e tali mo e loto fiemalie. Ko e me'a ki ho'o hoha'a ki hono fokotu'u atu 'a e ngaahi faka'ilonga, kataki 'o fakatokanga'i ange ko e to'o pe ia 'e he 'Etita mei he'eku electronic signature 'i he'eku email ngaue 'a ia na'e ha kotoa ai hoku contact details. Na'e 'uhinga pe ia ke fakakakato 'a e fiema'u faka'etita 'a kolomu ni ki hono fapapau'i 'o e tokotaha faitohi. Na'e 'ikai ha toe 'uhinga kehe.

'Oku ou tui kuou tali atu ho'o fifili pea ke kataki pe 'o tukunoa'i 'emau ngaue 'oku fakahoko kapau 'oku 'ikai 'aonga kiate koe, he mahalo 'oku 'i ai pe ha ni'ihi 'i Tonga na mo ha tapa pe 'o mamani 'e 'aonga kiate kinautolu 'emau ngaue. Hokohoko atu pe ho'o totongi tax ke tokoni ki hono totongi e fees 'a Nicholas Fisher he ko e fasi pau ia hono totongi 'e he kakai totongi tukuhau (tax payers) 'o hange pe koia ko e ngaahi hopo lahi kuo hoko 'i Tonga na 'a ia kuo tohi he hisitolia.

'Ofa mai aa Lou 'Uhila 'o tukuaa hono feinga'i ke fakapulou'i e mo'oni he ho'ataa malie.

'I he loto faka'apa'apa mo'oni

Dr Fotu K.V. Fisi'iahi

tofavaha03 [at] yahoo [dot] com ( tofavaha03 [at] yahoo [dot] com)