'Etita,

KATAKI kae tu'u atu e fakahoha'a ni. 'Oku 'ikai te u tui tatau pea mo Dr. Fisi'iahi ki hano fokotu'u 'o e kautaha ki he kau Polisi koe'uhi ko 'enau ta'efiemalie. 'Oku hanga 'e he tohi ni 'o fakaha mai heni e mamaha 'o e fakakaukau 'a Dr. Fisi'iahi pea mo e si'i 'ene 'ilo ki he lao mo e kakano 'o e ngaue mo e fatongia ko ia 'o e Komisiona Polisi.

'Oku hoko e tohi tangi ia koeni ko e sio fakafo'ituitui ki he sino 'o Kelly kae ngalo ai e ngaue ia pea mo e taumu'a 'o e lao. Kaekehe ngalo foki ne fokotu'u 'a Dr. Fisi'iahi ke ne Minisita Polisi he fokotu'utu'u ne taku ko e fakakata ne fai 'e he PSA he ngaahi ta'u kuo maliu atu.

Mahalo ka tu'u e fanga ki'i kautaha ko ena 'oku fokotu'u 'e he Dr. mahalo 'e 'ikai ha ngaue ia 'e lava he ko e ta'efiemalie pe ha taha ia ki ha me'a ko e kuo uki ha ki'i fakataha ka 'oku 'i ai pe founga ngaue mo e sitepu ki hono fakaha 'o e ta'efiemalie pea kou tui 'oku 'osi 'ilo'i pe ia 'e he kau Polisi pea kuo nau fai 'o kau ai mo e tohi tangi 'a ia 'oku 'i ai 'enau totonu fakalao ki ai.

'Oku 'ikai ke u tui ki he pehe 'oku 'i ai e tukufakaholo ko e taliangi ta'etoefehu'ia he Polisi. 'I he taimi tatau 'oku 'i ai e fiemalie lahi tautautefito ki he ngaahi kulupu 'oku nau tokangaekina e totonu 'a e kakai fefine mo e fanau ki he ngaue 'a Kelly. Tukukehe kapau 'oku 'ilo 'e he Dr. ia ha toe me'a kehe.

Kuo 'i ai e ngaahi faka'ilonga e lelei e fakahoko fatongia 'a e kau polisi pea pehe ki hono tauhi e melino pea 'oku fai e fakamalo lahi ki he matu'a mo e tu'unga finematu'a 'oku nau fakahoko fatongia he potungaue ki he ngaue lelei 'oku nau fai.

Faka'apa'apa atu,

Samiu Sika

samiusika [at] rocketmail [dot] com ( samiusika [at] rocketmail [dot] com)