'Oku tu'u lavea ngofua a Tonga meihe Tsunami [1]
Friday, July 8, 2011 - 16:07. Updated on Monday, September 9, 2013 - 18:40.
'Etita,
'OKU ou fakamalo lahi atu ki he Talekita 'o e Va'a Vakai Matangi 'a Tonga ki he'ene fakama'ala'ala mai 'a 'ene hoha'a ki he ngaahi me'a ke fakalelei'i koe'uhi ko e malu 'a e kakai 'o e fonua 'i ha hoko mai ha ngaahi fakatamaki faka-e-natula kae tautau tefito ki he Tsunami. 'Oku 'osi lave'i 'e he Tonga kotoa 'a e natula faka'auha 'o e Tsunami pea kuo a'usia ia hotau kainga mei Tokelau mama'o. Ne mole ai e ngaahi mo'ui pea maumau'i ai e ngaahi koloa lahi.
'Oku ou tui 'oku kau eni he me'a mahu'inga 'oku totonu ke fika 'uluaki 'i he 'asenita ngaue 'a e Pule'anga mo e ngaahi kupu fekau'aki ki he fakatamaki faka-e-natula. He ko e palopalema 'o e mofuike mo e Tsunami, 'oku 'ikai ha me'a ngaue te ne predict 'ene hoko, pea ko e fononga 'a e Tsunami 'oku fu'u vave faka'ulia. Hange ko ia ko e lave 'a e Talekita Va'a Vakai Matangi 'a Tonga, 'oku fu'u tu'u lavea ngofua 'aupito a Tonga ni, tautautefito ki Tongatapu, Ha'apai mo e ngaahi 'otumotu ma'ulalo ka hoko mai ha Tsunami ki he kotoa hotau ngaahi 'otumotu. Kapau 'oku tau palopalema 'i he hoko 'aho mai 'a e fakatokanga Tsunami, huanoa ai kapau ko ha me'a po'uli 'i ha taimi 'oku 'osi tapuni ai 'a e letio mo e ngaahi ngaue'anga 'a e Pule'anga? Koeha nai ha palani 'a e Pule'anga ki ai? Ko e mo'ui 'e fiha 'e fakatefito 'enau malu 'i he fai tu'utu'uni vave mo ha ngaue fakamatoato 'a e Pule'anga fekau'aki mo e kaveinga koeni?
'Oku ou kole atu ki he ngaahi kupu fekau'aki kotoa ke mou ngaue fakataha koeuhi ko e malu 'a e kakai 'o e fonua, 'oku faka-tefito ia 'iate kimoutolu.
Faka'apa'apa atu,
Lopiseni Kavapalu