'Ikale Tahi, No. 9 'I mamani he 'akapulu [1]
Thursday, October 6, 2011 - 16:30. Updated on Monday, September 9, 2013 - 18:40.
Tasi.
'Etita,
FAKAMOMEMOME pe kae tu'u atu 'a e ki'i fakamalo ma'ulalo koeni ki he faiako, kau tokoni faiako mo e kotoa 'o e management 'o e timi 'Ikale Tahi pea pehe ki he kapiteni mo e toenga kotoa 'o e kau va'inga. 'Oku 'ikai foki ngalo mo e poate pea pehe ki si'i ngaahi famili hono kotoa pe 'o e kau va'inga mo e kau officials he kalusefai homou taimi mo homou ngaahi 'ofa'anga, kae lava ke ma'u ha ola lelei ke tau fiefia kotoa ai.
Kuo mou fai 'a e va'inga fakaholomamata pea fakafiefia ki he Tonga kotoa pe he kolope pea mau lave atu ai mo kimautolu 'oku mau fakapaea 'i he ngaahi fonua muli. Kou tui ko e toki hoko eni ha fa'ahinga me'a kene hanga 'o fakama'opo'opo kotoa ai 'a e loto mafana mo e fiefia 'a e Tonga kotoa pe 'i mamani, 'i ha fo'i momeniti pe 'e taha. Kou tui ko e Tonga kotoa pe na'e mamata pe fanongo letio kihe va'inga 'a 'etau fanau, na'e hihiki fakataha kotoa pe 'etau fiefia he momeniti na'e puhi ai e fakamaau he 'osi 'a e taimi. Pea ko e fo'i momeniti eni 'oku ou mahu'inga'ia ai, ko 'etau fiefia fakataha 'a e Tonga kotoa he fo'i momeniti pe 'e taha neongo 'a 'etau 'i he ngaahi potu kehekehe he funga 'o e mamani. Tau fakafeta'i mu'a ai ki he 'Eiki he lava ke fai 'e he fanau va'inga mo e faiako mo e kau tokoni ha ngaue lelei ke fiefia fakataha ai 'a e Tonga mo e kakai kotoa na'e poupou ki he'etau timi va'inga.
Kuo te lave'i hifo 'a e poupou lahi 'oku fai 'ehe Pule'anga, 'o taki mai 'ehe 'Eiki Palemia, Tu'ivakano kae'uma'a si'i kau Taki Lotu pea pehe ki he kakai kotoa pe 'o e fonua 'o a'u ki he'etau longa'i fanau valevale pea ko e me'a fakamafana lahi faufaua. Fakamalo atu ki he kakai Tonga 'o Aotearoa he poupou lahi pea mo e tokoni kotoa pe na'a mou fai he taimi na'e 'i hena ai 'etau timi 'Ikale Tahi pea 'oku toe 'amo atu 'a e fakamafana ho'omou poupou. 'Oku ou toe lave'i pe mo e ngaahi poupou mei he ngaahi tapa kehekehe 'o mamani 'oku fai mei ai 'a ho'omou poupou 'o a'u ki he'etau fanau 'oku fakakaungatamaki he fakamelino mei Afghanistan.
Kuo lava e si'i faifatongia si'etau fanau pea ko hono tanaki tu'unga 'o si'enau va'inga kuo 'unu hake ai 'a Tonga he fakahokohoko 'o e ngaahi fonua 'akapulu 'i mamani (IRB ranking) 'o fika 9. Ko e tu'unga ma'olunga taha eni kuo a'u kiai 'a e maa'imoa 'Akapulu'I he hisitolia hotau ki'I Fonua. 'Ikai ngata ai ko e ola 'o 'etau va'inga mo Falanise kuo tohi ia he hisitolia 'o e world cup ko e "greatest upset" talu e kamata 'a e fe'auhi ni mei he 1987.
Ko e fokotu'u fakakaukau, koe'uhi ko e ola e performance 'a 'etau timi mo e kau faiako, koeha leva 'a e sitepu ke tau hoko atu kiai. 'Oku 'alu pe 'a 'etau kalafi ki 'olunga mei he ola 'o 'etau va'inga he 2007 ki he 2011 'oku mahino 'a e fakalaka ange 'a e va'inga pea ko e ola ia 'oku tau faka'amu ia. Ko e me'a ki mui 'a e pehe ia na'e mei toe sai ange he 'oku tofuhia kotoa pe 'a e kotoa e ngaahi timi va'inga kotoa pe he fe'auhi ni. He 'ikai ke haohaoa aipe 'a e timi kotoa pea na'a mo e ngahai timi 'iloa All Blacks, Wallabies, Springboks, 'oku 'iai pe fanga ki'i too nounou ke fakalelei'i 'o tatau pe mo 'etau timi.
'Oku ou mahu'inga'ia 'aupito ke pukepuke 'a e kau faiako mo e kau va'inga koeni he ta'u ni ke nau hoko atu pea 'oange ha'a nau faingamalie ke nau fa'u ha'anau palani fakalakalaka lelei ki hano teu'i 'a 'etau fanau va'inga kihe world cup hoko he 2015. 'Oku hange kuo kamata ke feangai mo fu'u maheni 'aupito 'a e fanau he'etau timi koeni pea mo nau faaitaha ange. 'Ikai ngata pe 'i honau vaa fakatamaiki va'inga ka ko honau vaa mo e kau faiako foki pea ko e me'a faingata'a taha pe ia. Ko e taukei va'inga mo e taleniti mo e sino malohi kou ma'u kotoa pe ia he'etau fanau pea 'oku faingofua pe hano ako'i mo fakalelei'i ia 'o 'ona. Ka ko honau vaa, ko e me'a ia 'oku mahu'inga taha. 'E toe lava foki ke nau toe tu'u malohi ange kapau 'e lahi ha ngaahi faingamalie ke nau va'inga fakataha ma'u pe he ta'u 'e 4 ka hoko. 'E toe vaofi ange ai 'a 'enau ngaue fakataha 'o hange pe ha vaa 'o ha Tamai mo ha'ane Fanau totonu.
Ko e me'a lahi ne u fakatokanga'i he'etau timi he ta'u ni 'i hono fakahoa ki he ngaahi timi kimu'a, 'oku fu'u ma'olunga 'aupito 'a 'enau fitness pea 'oku nau va'inga'i 'a e miniti 'e 80 kakato 'i he pace 'oku fu'u vave 'aupito pea toe lahi mo e physical contact, ka 'oku 'ikai pe ke holo 'enau va'inga 'o a'u pe ki he 'osi 'a e taimi. 'I he taimi tatau pe 'oku 'I ai pe fanga ki'i me'a ikiiki ke fakalelei'i pea ko 'eku tui ia ke 'oange ha faingamalie kihe kotoa pe 'o e kau faiako ko eni ke nau fai hono fakalelei'i mo fakatonutonu 'a e fanga ki'i me'a ko ia kimu'a he world cup hoko. Ko e 'avalisi 'o e ta'u motu'a 'etau fanau va'inga he taimi ni 'e malava pe ke tau pehe ko e meimei peseti 'e 90 'o e timi he taimi ni te nau to e va'inga pe he world cup hoko. Kuo nau a'usia 'a e mafana 'o 'enau va'inga fakataha pea ko e tokoni lahi ia kapau 'e pukepuke fo'i mafana koia ki he 2015.
Faka'osi pe 'oku ou toe kole atu ki he Tonga kotoa ke tau poupou mu'a ki hono fakatolonga 'a e ola e va'inga lelei 'a 'etau timi 'Ikale Tahi 'i hano 'ave kakato 'etau falala mo e tui 'e malavanoa pe ke tau toe a'u ki ha tu'unga ma'olunga ange he 2015 ka tau toe 'oange ha toe faingamalie ma'ae kau faiako he taimi ni ke nau hoko atu.
Malo moe 'ofa lahi atu.
Tasi
LeonaitasiT [at] forumsec [dot] org [dot] fj ( LeonaitasiT [at] forumsec [dot] org [dot] fj)