'Ikale Tahi 2011 [1]
Thursday, October 13, 2011 - 06:21. Updated on Monday, September 9, 2013 - 18:40.
'Ikale Tahi 2011
Tulou, Tulou mo Ha'a Moheofo
Mo Ha'a Takiama he anga 'o e nofo
'Otua mo Tonga ko hota Tofi'a
Vilingia 'eta Fuka ko Hono ta'ata'a.
'Unaloto atu e Faa'i Kuonga
Mokoi fiefia ko 'Ene maa'imoa
Molumalu he ko 'Ene fakahuafa
Ko 'eta 'Ikale Tahi kae kapapuna.
Fangatapu me'a pe kau talanga
Fiefia ni he'ikai pea he 'ikai ngata
'Ikale Tahi te u pole ho'o faivaola
Fielau ko e namoa ne faka-Folofola.
Ta'u 'o e ma'alali ki he Ipu 'a Mamani
Teuteu ne lava ka ko e taimi si'i
Tonga ne fili ke ta 'a e 'uluafi
Fepaki mo e Hulufe Siliva hau e mala'e ni.
Sikalamu ne 'ikai matu'uekina
Molo mo e ulaki 'ikai ta'ofia
Foueti mahino ko e malohinga
Tau'aki tangata hoatatau mo e hau na.
Fanguna ha tanaki ki he Hisitolia
Tohi tongi ikuna ni kafakafa
Palesi ena ne futa'aki hono fuu mafi
Kae veuki lototoa 'e he 'Ikale Tahi.
Hounga e feohi hotau Paenga 'A'
Kia Ora Te Na Koutou Katoa
Arigatou Tokyo ken Shibuya
Merci Merci Lou Mapele Kula.
Halatongaleva ko ena ho kakala
Fiifii mo Tongamoana kuo na laulotaha
Polepole ai he ko ho'o fanautama
Tataki e ikuna ne fakaholomamata.
Te u hiva, te u me'e, te u haka mo tuee
'Aho 'o e fiefia ma'ae 'Otu Felenite
Tau fetakinima poupou ki he taleniti
Fakakoloa'aki 'a Tonga 'e hota 'Eiki.
Tu'amelie atu ki he 2015
Pau 'eta kau 'i hono alea
Mamani va'inga ki he ikuna
Kae tau 'a Tonga ia ma'a Hono Kololia.
Tuee, tuee, tuee ma'u aipe
'Ikale Tahi lava ho'o fakapuepue
To'oa e loto 'o e Tonga kotoa pe
Tu'utai he tapa kehekehe 'o e kolope.
Tatau atu ka mau lele aa
Tali meia Lincoln mo e 'Ikale Tupu'a
Poupou atu mo e hufekina
Ke tu'uloa 'a Tonga pea fakahoifua.
Faka'apa'apa atu,
Tu'iono & Fa'otusia
balwynf [at] yahoo [dot] com ( balwynf [at] yahoo [dot] com)