'Etita,

'OKU 'oatu heni 'a e kole ke ke anga'ofa mu'a 'o paaki atu 'a e ki'i fakahoha'a ko'eni 'o kau ki he lao fo'ou ko'ena na'ake fakamatala kiai 'I he matangi tonga 'I he 'aho 18 'o 'okatopa 2011.

Ko e lao fo'ou ko'eni 'oku fekau'aki ia pea mo hono fakapa'anga 'e he Pule'anga Tonga 'a e faito'o fakafalemahaki 'a e kau memipa 'o e Falealea 'I he ngaahi fonua muli.

Ko 'eku ngaahi fakaanga 'eni ki he lao fo'ou ko'ena :-

(1) Ko e lao ko'ena 'oku ata kovi koe'uhi he ko e lao pe ia 'oku fa'u 'e he kau memipa 'o e Falealea 'o Tonga ke ma'u ai ha lelei pe 'anautolu ka 'oku 'ikai ko e kakai 'o e fonua. Na'aku pehee 'e au ko 'etau fili 'a e kau fakafofonga ke nau fa'u ha ngaahi lao ke fakalakalaka 'aki 'a e tapa kehekehe 'o 'etau mo'ui, ta 'oku 'ikai!

(2) Ko e lao ko'ena 'oku laulanu koe'uhi he 'oku fa'u pe ia ki he ki'i tokosi'i koia 'oku memipa 'I he Falealea kae 'ikai ko e toenga 'o e kau ngaue fakapule'anga 'o Tonga pea mo e kakai 'o e fonua. Hangee kiate au ia 'oku mahu'inga ange 'a e mo'ui ia 'a e kau Memipa 'o e Falealea 'I he toenga 'o e kakai 'o Tonga.

(3) Ko e fakamole ia 'o e faito'o fakafalemahaki 'i muli 'oku 'ikai ko ha 'atunga lau. 'E a'u pe 'a e totongi ia ki he lauiafe, lauimano, laukilu, pea miliona. Pea tau mai a 'e lava 'e he Pule'anga Tonga ia 'o ta'ofi 'a e ngaue 'a e kau toketa kae tuku e mahaki ia ke mate. Ko e hopo sivile ia.

(4) Pea kapau e hoko ha palopalema pea 'alu kihe fakamaau'anga ko 'e tau toki too atu ia kihe lau miliona.

'Oku teeki ke tau a'u kitautolu ki he mo'oni 'o e ngaahi fakamole 'e hoko mei he lao ko'eni. mahalo 'oku fakapotopoto ange pe ke ta'ofi kei taimi he 'oku ngali kovi pea fakamole 'aupito ki Tonga ko e ki'i fonua masiva. Ngaue 'aki 'a e pa'anga ke ma'u ha lelei fakalukufua ma'ae kakai 'o e fonua. 'oku ou kole atu ke tamate'i 'a e lao ta'etotonu ko'eni kae tui e kakai ki he kau memipa pea mo e Falefalea 'o Tonga. Kuo ha 'a e Pule'anga Fakatemokalati ia? kuo navu aipe 'e he ki'i tokosi'i ia ko'eni 'a e fu'u pa'anga lahi ko'eni 'a e fonua!

Faka'apa'apa atu.

Siosaia Fatani

sstuakoi [at] yahoo [dot] com ( sstuakoi [at] yahoo [dot] com)