Ma'ama'aange 'a e puna ki 'Okalani 'I ha'ate puna ki Vava'u [1]
Saturday, December 10, 2011 - 18:51. Updated on Monday, September 9, 2013 - 18:40.
'Etita,
'OKU lolongo pe foki 'a e kakai 'o e Vahefonua Vava'u ni, 'o neongo pe 'oku nau loto kiai pe 'ikai, ka 'oku 'ikai ha toe faingamalie ia ke nau fili 'a e me'a 'oku fe'unga mo honau ivi fakapa'anga.
Ko e taha eni 'a e hoha'a lahi taha 'oku tuku loto'I 'ehe kakai 'o Vava'u ni, ko e mamafa ange 'a e totongi vakapuna 'I he vaha'a 'o Vava'u ni mo Tongatapu 'I he totongi he vaha'a 'o Aokalani mo Tonga ni.
Ko e full fare mei Vava'u ki Nuku'alofa 'oku $296.00 one-way, pea 'oku $592.00 return ki Vava'u. Ko e fea ma'ama'a 'oku $231.00 one-way pea 'oku $462.00 'a e return kapau 'oku puka kimu'a 'a e folau.
Na'a ku ki'I folau atu he uike 'e 1 ki 'Aokalani 'I he mahina kuo hili, pea na'e fe'unga mo e $490.00 'a e fea ma'ama'a ki he 'alu mo e foki 'I he kautaha vakapuna Polynesian Pacific Blue Airline.
Na'e 'I ai foki 'a e fakaangaanga 'a e pule'anga ke kamata ha puna 'a e Air Pacific mei Nadi Vava'u- Tongatapu 'I Novema 2011, 'aia ko e mahina kuo 'osi, ka 'oku te'eki ai ke mahino pe koehaa e me'a 'oku hoko kiai.
Na'a ku lele atu ki Tongatapu, peau lave'I 'oku 'I ai 'a e ongo ki'I vakapuna , 'oku fu'u fuoloa 'ena tau 'I he terminal fakalotofonua.
Pea ne u fehu'I ange ki ha tokotaha pe koehaa 'a e ongo vakapuna koeni 'oku ou fakatokanga'I 'ena tau . Pea na'e fakahoko mai 'e he tokotaha koeni, ko e ongo vakapuna 'a e motu'a Tonga, na'a ne alea mo e kau taki falala'anga 'o hotau ki'I Pule'anga kalisitiane ni, ke ne 'omai ke tokoni ki he kakai hotau fonua ni 'I he fefolau'aki vakapuna fakalotofonua.
Kae me'apango, talu hono 'omai 'a e vakapuna 'o a'u mai ki he 'aho ni, 'oku teeki ai ke 'oange 'ehe pule'anga ia ha ngofua ma'ae ki'I kautaha 'a e motu'a Tonga koeni ke ne fakahoko 'a e fatongia fefolau'aki fakalotofonua ma'ae kakai 'o Tonga ni.
Pea u pehee ange, mahalo pe na'a 'oku 'ikai fe'unga 'a e ki'I vakapuna ke fakahoko 'a e fatongia. Pea talamai 'ehe motu'a, ko e tokotaha 'oku 'o'ona 'a e ki'I kautaha 'oku nau 'omai 'a e vakapuna koeni, 'oku 'ikai hano toe ua 'ona 'I Tonga ni, he ko e tokotaha ' enisinia vakapuna fakavaha'apule'anga - pea 'oku ne fai mo e sevesi 'a e ngaahi kautaha vakapuna kotoa pe mei muli 'oku tu'uta mai ki he mala'e vakapuna Fua'amotu.
Pea u 'eke ange pe koehaa koaa ha fu'u 'uhinga 'oku faingata'a ai ke 'oange 'a e laiseni.
Pea kata 'a e matapule 'o ne talamai, "Me'aa 'oku talaange 'e he kau fiepoto he 'enisinia vakapuna ke 'omai e ngaahi vakapuna mei Siaina ke ne fakalele'aki 'ene ki'I kautaha. Kae hili koia kuo 'osi fakamahino ange 'e he fu'u enisinia mataotao koeni - 'oku palopalema 'a e ngaahi vakapuna koia 'o 'ikai ke fe'unga mo Tonga ni."
Ko e me'a 'oku fakalilifu taha, 'oku lolotonga totongi pe 'ehe motu'a Tonga koeni 'a e fakamole kotoa ki he tau ta'engaue 'a e vakapuna koeni 'I he mala'e vakapuna Fua'amotu.
Kae kei vangoo holo e kakai 'o e fonua he mamafa 'a e totongi vakapuna 'a e kautaha muli koeni 'oku lolotonga fa'ifa'iteliha 'I he folau vakapuna fakalotofonua.
'Oku fiema'u ke 'I ai ha fair competition 'I he folau vakapuna fakalotofonua, koe'uhi ke ma'u 'ehe kakai 'o e fonua ha sevesi 'oku fakafiemalie pea mo ha totongi 'oku faka'atu'I 'o fe'unga mo e ta'ema'ungaue 'a e kakai 'oe fonua 'I he lolotonga ni.
'Ofa he kakai Tonga
Paula K. Kava
paul [dot] kava [at] gmail [dot] com ( paul [dot] kava [at] gmail [dot] com)