'Etita,

'OKU ki'I malona hifo foki 'a e felauaki koia fekau'aki mo e 'ikai fakafiemalie koia ki he kakai 'o e vahefonua Vava'u, 'a e fokotu'utu'u koia 'a e pule'anga ke fakalele pe 'a e kautaha folua vakatahi 'e taha ki he vaha'a 'o Nu'usila mo Vava'u.

Neongo 'oku mau fu'u monu'ia 'aupito 'I he fokotu'u koia 'o e kautaha vaka 'a e JAWS, ka 'oku mau tui ta'eveiveiua 'oku mahu'inga 'aupito pe ke kei lele pe mo e vaka 'a e kautaha Reef Shipping. 'Oku taha pe hono 'uhinga , he ko e founga pe 'eni 'e lava ai ke pukepuke hifo 'a e totongi 'o e feleti uta 'I he vaha'a 'o Nu'usila pea mo Vava'u ni.

Kuo 'osi a'u foki 'a e feleti 'o e tangai me'akai 'aisi kilo 'e 25 ki he NZD$25.00 ki he tangai 'I he kautaha Reef Shipping.

Pea ko e taha eni e tefito'I 'uhinga 'oku holoa pehee ai 'a e loto'I fie ngoue 'a e kau ngoue 'I Vava'u ni.

Ko hono 'uhinga, 'oku laka hake he 50% 'a e fakamole ki he feleti ki hono 'ave 'a e tangai me'akai ki Nu'usila 'I he totongi 'o e tangai me'akai 'I he'ene tu'uta atu ki Nu'usila.
Hange koeni, ko e tangai manioke 'I hono fakatau atu 'I NZ ko e NZD$40.00, ka ko e fakamole ki he feleti ko e NZD$25.00, te'eki lau kiai 'a e fakamole ki hono ta'aki mo e fohi 'o fetuku 'I Vava'u ni.

Kapau leva 'oku fonu 'a e koniteina 'aisi fute 'e 20 'I he tangai me'akai 'e 600 @ 25kg, pea ko e feleti ki he koniteina koia 'oku fe'unga mo e NZD$15,000.00, 'aia 'oku fu'u mamafa fakavalevale 'aupito.

'Ikai ke ngata ai, ka 'oku fu'u mamafa 'aupito 'a e feleti 'o e container 'aisi mei Vava'u ki Nu'usila, he kuo 'osi laka hake 'I he NZD$6,000.00. Pea 'oku faingata'a 'aupito ke te puka ha fo'I container 'aisi taautaha, he 'oku faka'ai'ai pe 'e he fakafofonga vaka ia 'I Vava'u ni, ke 'ave tangai pe 'a e uta 'I he'enau container 'aisi 'aia 'oku feleti NZ$25.00.

'I he'ene pehee, 'oku mau tui ta'eveiveiua 'oku totonu ke fakatou lele loua pe 'a e ongo kautaha vaka ni, ke na kei fe'au'auhi 'o fakalakalaka kimu'a 'ena sevesi ma'ae kakai pea mo pukepuke 'a e totongi 'o e feleti 'I ha tu'unga 'oku fakafiemalie mo fe'unga mo hotau vaivai.
He ka ta'ofi 'a e Reef Shipping, 'e malava pe ke toe mamafa ange 'a e JAWS neongo 'oku fu'u ma'ama'a 'aupito 'enau feleti he lolotonga ni.

'Oku mau fakamalo atu ki he kautaha Reef Shipping ki hono fataki mai 'a e fatongia folau vakatahi ma'ae kakai 'o e vahefonua ni 'I he ngaahi fu'u ta'u lahi kuo nau fai fatongia mai ai.
Pea 'oku pehee foki mo 'emau fakamalo lahi atu ki he ongo matu'a Vava'u koeni kuo na loto lahi ke na 'omai ha vakatahi 'o fai fatongia hangatonu pe ma'ae kakai 'o e vahefonua Vava'u ni pea mo e kainga 'o e fo'I 'one'one. Kapau 'e toe lava mo e fakamaketi, ko'ene toki kakato leva ia 'a e misiona kuo laui ta'u hono faka'amua 'ehe kau ngoue 'o e lolo mo e pako.

Ko e me'a teepuu 'oku mau kolenga atu, ke mou tokoni mai ke langomi homau masiva mo e tu'utamaki, neongo ko ho'omou pisinisi mo e fakatupu pa'anga 'oku fai.

'Ofa he kakai Tonga

Paula K. Kava

paul [dot] kava [at] gmail [dot] com ( paul [dot] kava [at] gmail [dot] com)