'Etita,

Kataki pe mu'a kae tuku atu e ki'i fakamalo tu'a ni ki he Palemia pea mo e pule'anga Tonga koe'uhii ko ho'omou loto lahi mo tau'ataina kae fokotu'u e Komisoni ki he Ashika. Ne mahino pe mei Falealea ne 'i ai e loto 'o e Fale ke 'i ai pe ha'anau Komisoni ka ko ho'omou loto lahi ne fokotu'u ai e Komisoni.

'Oku makatu'unga pe fakamalo ia koe'uhi he ko e me'a ne lilo 'oku 'ikai kio ka kuo kalou pea kaila 'o mea'i 'e hou'eiki pea 'ilo ki ai 'a me'avale. Tuku pe mu'a e vaka ia ke toki 'omai e aofangatuku 'a e komisoni. Kaekehe, kuo hanga 'e he Komisoni 'o ta'aki mai e me'a lahi.

Kuo toki mahino mai e angafai 'a e pule'anga mo e founga ngaue pea mo si'ono ngaahi kitautolu 'e he kau muli. 'Oku tokolahi foki e ni'ihi 'e lelei ange ke tala atu 'e ha muli ha me'a ke fai 'i hano tala atu 'e ha Tonga. Neongo e tonu mo e lelei ange 'a e Tonga.

Kuo hanu e kakai he totongi mamafa 'a e 'uhila, pea ta koaa koe kulo ngako ia 'a e tama tui piva, pea ko hono mamana 'ana ia heka kalasi 'uluaki he vakapuna mo nofo hotele mamafa kae piko hotau tu'a he totongi 'ene fakamole.

Neongo 'oku ngali toe hoke'ia pe moe pule'anga hono fokotu'u e komisoni, ka kou fakamalo atu he kuo mau 'ilo e me'a lahi, pea kataki toe 'oatu moe ngaahi me'a 'oku kei tanu ke komisoni'i mo ia, pa'anga he paasipooti, kautaha vakapuna Royal Tongan, faka'osi moe poate 'uhila 'a Tonga ke kakato ke kau ai e fakatau ki he Shoreline he kou tui 'oku kei lahi pe me'a ta'aki hake. Hange koe lau fakama'a ai leva kae fai e liliu 'oku fo'ou mo ma'a e fonua.

Faka'apa'apa atu,

Samiu