Pule'anga temokalati: pule a ifo ka e tuku a 'ilo [1]
Friday, January 1, 2010 - 06:29. Updated on Monday, May 19, 2014 - 17:26.
'Etita,
'Oku lahilahi 'a e ilifia tevolo he teuteu liliu fakapolitikale ko'eni 'oku 'ai ke fakahoko 'i Tonga ni. 'Oku lahi mo e ngaahi fakakaukau faka'ofo'ofa ke fili ha kakai 'oku poto mo lelei ke nau hoko ko ha ngaahi taki lelei, ka 'oku 'ikai ko e me'a ia 'oku fa'ahoko 'i he taimi lahi 'i he founga temokalati. Pea ko hono fakamo'oni 'eni - 'oku lahi ange 'a e ngaahi pule'anga maumau ka 'oku fakatemokalati 'i maama ni 'i he ngaahi pule'anga temokalati 'oku maau mo melino. Meimei ko e ngaahi fonua ma'ume'a mo tu'umalie 'oku ngaue ai 'a e temokalati ka ko e ngaahi fonua 'ou masiva 'oku 'ikai ke fa'angaue ai 'a e temokalati ia.
Kaekehe, ko'eni 'e fakahoko 'a e liliu, pea neongo ha fu'u kakai lelei mo poto 'e kau 'i he kanititeiti fili ka 'oku 'ulungaanga 'aki 'a e tangata ke fili ki hono ifo ka e tuku 'a e me'a 'oku ne 'ilo 'oku lelei. Fakataataa 'aki pe 'a e ma'u me'a ngako mo e ma'u me'a melie. 'Oku tala ma'u pe pea ako'i 'e he potungaue mo'ui 'a e fanau ako 'i loki ako pehe ki he kakai kotoa 'o e fonua 'i ha ngaahi polokalama ako 'i he televisone mo e letio 'a e mahu'inga ke nau ma'u 'a e ngaahi me'atokoni 'oku tu'ufonua he 'oku fo'ou pea sai ange ki he sino pea tenau mo'ui lelei ai. 'Ikai ngata ai ka 'oku hoko 'a 'ete ma'u me'atokoni mei he me'atokoni tu'ufonua ke ne ta'ota'ofi 'a e ngaahi mahaki kehekehe 'o hange ko e suka. Ko e fakataataa 'e taha 'a e ma'u tapaka. 'Oku tala ma'u pe 'a 'ene kovi ki he sino mo fakatupu kanisa, ka 'oku 'ikai ke tuku 'a hono ma'u 'a e tapaka 'i he fonua ni he 'oku 'i ai hono ki'i ifo. Pea 'oku pehe pe mo e 'ulungaanga 'o e tangata 'i he taimi 'oku ne fili ai ha'ane fakafofonga ki he fale alea. 'Oku 'osi angamaheni 'a e fonua ni ke nau fili ki honau ifo, ka e tuku ai pe 'a e me'a 'oku nau 'ilo 'oku lelei.
'Oku ou tui ko e taha pe 'eni 'o e ngaahi vaivai'anga lahi 'o e temokalati, he 'oku pule 'a ifo ka e tuku 'a 'ilo.
Faka'apa'apa atu,
Daniel K. Fale