'Etita,

'Oku malie ngaahi feme'a'aki he Fale pea fakamalo atu ho'o 'omai ke mau lave ai. Ka 'oku fakatupu fifili e ngaahi me'a 'oku hoko hotau Fale'eiki.

Te u ki'i lave si'i atu pe ki he'eku hoha'a ki he ngaue'aki 'o e tu'unga ki he kumi lelei fakafo'ituitui.

Kuo mahino mai kuo fai e tu'utu'uni 'a e Potungaue Toutai ki he lahi 'o e ngaahi laiseni ke nau hu atu e mokohunu ki muli pea pehe ki he lahi 'o e mokohunu ke uta atu. Ko e me'a ni 'oku fepaki e tu'unga 'o Nopele Lasike ko e Fakafofonga Falealea mo 'ene vili ta'e'unua ke foaki ange ha'ane laiseni uta mokohunu (conflict of interest). Fefe nai kapau ne 'ikai ke kau he kau kole ngofua laiseni, me'a ni 'e kei vili pehe?

Ko e me'a 'ilo 'a e fale, hange ko e lau mou fa'iteliha he ko ho'omou me'a kae manatu'i si'i kainanga e fonua. 'I he kamatakamata mai hono tu'uaki 'o e Temo ne kau e vahe tu'ataimi 'a e Falealea pehe ki he vahenga 'o e hou'eiki memipa hono 'ohofi. Kuo ha e taimi ni 'oku 'ikai toe 'ohake ai?

Ne fa'a tala he taimi 'e ni'ihi ko e lulutava, pea a'u mai ki hono tukuaki'i 'oku hiki peseti 'e 160% e vahenga e hou'eiki minisita ta koee ko e koto loi.

Ka ko e poini, fokotu'u atu ke 'oua tuku ki he hou'eiki memipa ke nau pule ki honau vahenga kae 'oatu ha sino tau'ataina kene vakai'i honau vahenga he koena ne 'ikai ke nau tali e fokotu'u 'a e mataotao, ka nau holi kinautolu ke nau ta'etotongi tukuhau. 'E fefe si'i tangata'eiki toutai 'oku velahia he la'aa mo mokosia he 'uha 'i 'uta, fefe si'i kau fakamaketi. 'Oua mu'a 'e hau pea kui.

Faka'apa'apa atu

Samiu Sika