'Etita,

'Oku ou fakamalo atu ki he houe'iki memipa 'o e Komisoni he ngaue lahi mo ma'ongo'onga kuo mou feinga he vaha'a taimi nounou ne tuku atu ke mou fakahoko ai. Ko hono mo'oni ko e toe eni 'a e hou'eiki memipa 'o e Fale Alea ke nau feme'a'aki ki ai pea pehe ki he konga faka'osi 'o e lipooti pea mo e konga lahi taha hono toe fakafoki ki he kakai 'o e fonua.

'Oku lahi e ngaahi mo'oni'i me'a 'oku ha mai he lipooti 'oku fu'u matu'aki mahu'inga, ka 'i he tui vaivai 'a e motu'a ni ko e taimi 'a e me'a mahu'inga taha. Neongo ne 'ikai sipela hangatonu mai he lipooti ka kou tui 'oku 'ikai ke fe'unga 'a e taimi ke fai ai e ngaue ni hange pe ko ia 'oku toutou ha he lipooti. Kaekehe ko e sio atu pe eni 'a e ta'eako, ka ko e ngaahi palopalema mo e ngaahi fokotu'utu'u 'oku 'omai neongo 'oku 'ikai ko e aofangatuku ia ka 'oku fiema'u ha taimi fe'unga ke fakahoko kotoa ai e ngaahi fiema'u ke napangapangamalie mo lelei.

Koeha 'oku tau feinga ai e fakaveve'i kae 'ikai ke fai fakalelei ke maau he koena kuo 'osi mahino ko e liliu 'e fakahoko pea kuopau ke fai he kuo finangalo ki ai 'a Kingi Siaosi Tupou V.

'Oku tau fakatauange ki he hou'eiki memipa 'oe Fale Alea pea mo e pule'anga ke mou ngaue fakataha ma'a e lelei 'a e fonua, kae tuku e fakafo'ituitui mo e kumi ongoongo he ko 'etau lelei pe kovi he kaha'u 'oku 'i homou 'aofi nima.

'Ofa ke fakaivia kimoutolu 'e he 'Otua he ngaue mahu'inga 'oku mou hanga atu ki ai.

Faka'apa'apa atu

Pola Loiti