'Etita,



Hufanga atu 'i he Talamalu 'o e Fonua kae 'ataa 'a e fiefia tu'a ko'eni 'i he To Folofola fisifismu'a kuo tau fanongoa mo laau'ilo kiai 'i hono huufi 'o e Fale alea 'o Tonga Ta'u 2009.



Fai 'a e vakai tu'a kiai pea u pehe loto pe, seuke!! ta ko e fielau he na'e talu pe hono fakahifo mai ki mamani 'a e Tama ni (tapu moia) mo hono polo'i ke Tu'i, pea fai hono lotua 'e he fonua kotoa. Tautau tefito pe eni ki he konga kimui 'o 'ene folofola ki he liliu 'oku lolotonga fakahoko. Pea mo 'ene folofola'aki 'a e ngaahi naunau 'o e tauhi sipi lelei "ke fakataumu'a 'a e liliu ki hono Tauhi mo hono Malu'i 'a hono Kakai mo 'enau ngaahi totonu kotoa pe . . ." he 'oku mo'oni 'a 'ene folofola na'e kamata pe meia King Siaosi Tupou I pea mo e hou'eiki 'o e 'aho koia mo hono paotoloaki 'a Tonga mei he po'uli looloo, ki he maama faka 'Otua mo faka mamani lahi 'i he Konisitutone 'oku tau lolotonga fononga'ia. Pea hange ko'ene folofola 'oku totonu ke nau feveitokai'aki 'a e Hou'eiki mo e Kakai mo e Pule'anga 'i hono alea'i melino mo mahino mo fakapapau'i ko e fo'i paotoloaki ko'eni 'oku lolotonga fai, te tau toe 'unu ke lelei ange 'i he tu'unga lolotonga.



Koau 'oku ou kei tui pe au peau falala, 'e kei 'ofa ange pe 'a e hako 'o Tupou I 'iate au mo hoku pikilau, pea tene kei malu'i ange pe au mo'eku ngaahi totonu kotoa pe. Pea 'oku ou kei faka'amu pe 'e lava ke fai ha "Referendum" fai ha fili fakahahaloto fakafonua, he ko e me'afua totonu pe ia ki he "consensus of opinion" 'o e kakai Tonga kotoa pe 'i Tonga ni pea mo muli pe koeha koaa 'a e fa'ahinga liliu 'oku nau loto kiai. 'I 'Aositelelia ni 'i he konga loto mo e konga kimui 'o e 1990 tupu na'e 'i ai 'a e ki'i kulupu mo e fa'ahinga na'a nau ngaue'aki 'a e media 'i hono puhi 'o 'enau fakakaukau mo honau loto ke liliu 'a 'Aositelelia ni 'o Lepapulika, liliu mei he fakamalumalu ki he Tu'i Pilitania ke fili pe 'e he fonua ni ke 'ulu ki ha Palesiteni, kaekehe na'e manakoa 'aupito 'a e fakakaukau ni, a'u ki he polls fakamuimui, 'a e savea kimu'a pea toki fakahoko 'a e Referendum 'a e mahino 'a hono manakoa 'o e fakakaukau ni, ka 'i hono fakahoko 'a e Referendum 'o e 1999, kimu'a ia kae toki fakahoko 'a e fakakaukau ni, na'e mahino ta'e toe veiveiua ko e majority peseti lahi 'aupito 'aupito 'o e kakai 'o 'Aositelelia ni, na'e pea 'oku 'ikai ke nau poupou'i pe tali 'a e fakakaukau ko'eni. Koia telia na'a tau hange ko Fisi 'o too ki hee kae toe feinga ke kia holomui holo ka kuo tomui.



Kaekehe 'oku ou fie fakafeta'i pe au peau koloa'ia 'i he koloa kuo too mei hoku Tu'i 'Ofa. Fakafeta'i 'oku ne kei tokangaekina au pea mo si'eku ngaahi totonu kotoa pe. 'Oku kei tau ma'u pe 'i hoku 'atamai 'a e ki'i hiva na'a tau fa'a hiva 'i he kei ako 'a ee 'oku pehe "Tau'ataina ne foaki 'e he Tu'i ma'ae kakai, Tonga 'oku totonu ke fakamahu'inga'i si'a loto, si'i 'aho 'o e Tau'ataina: Fiefia !! mo Kalanga !! ki he Tu'i 'OFA !!! Tuee!!Tuee!!Tueeee!!" Tonga e ko e 'Ofa 'oku fetongi 'Ofa pe, ka 'oku 'ikai ke fetongi'aki 'a e Ta'e'ofa.



Ke Lakoifie Fuoloa 'a e 'Afiona 'e Tupou!!!, pea tauange ke kei fakamalumalu 'e Sihova 'a e 'Afiona mo Tonga pea mo ho'o Pule 'o Ta'engata.



Faka'apa'apa atu



Molumalu 'o Ha'angata

stuiivai [at] yahoo [dot] com [dot] au