'Etita,

‘Oku pehe 'e Saia Mila 'oku 'uli mo palaku 'a Nuku'alofa tupu mei he: 1 - lahi e ngaahi me'alele maumau mo popo he ngaahi 'api moe ve'ehala, 2 - Fakamaketi movetevete he ngaahi ve'ehala, 3 ...– Ifi tapaka he ngaahi fale kalapu tatau pe 'i Ha'apai mo Tonga.



Me'apango malie ia Saia Mila kapau he 'ikai te ke toe 'alu kiho fonua tupu'anga na'ake hola mei ai. Ko e ola 'eni ho'o 'alu kiai, ko ho'o 'alu e kihe fu'u fakataha fakalotu pea ke foki atu koe 'o talamai e 'uli mo palaku si'i 'Otu motu anga'ofa. Manatu ai ki he ki'i talanoa koia kihe hu mai 'a Sisu mo 'ene kau ako ki tu'a he tapanikale 'o kuhukuhu e kau ako mo tala 'a e namu ta'efe'unga e kuli mate kae talaange 'e Sisu 'a e ma'a e nifo 'o e kuli. Kou tui na'e lahi pe ha ngaahi me'a lelei mo faka'ofo'ofa na'a ke mamata ki ai lolotonga ho'o 'i Tonga keke foki moia 'o fakamatala mai, ka kuo ke foki koe 'o 'afungi mai ho'o ta'e mahino mo e loi.



'Ikai keke mahino'i ko e tu'unga 'i he vaivai fakapa'anga 'a e ngaahi famili 'e ni'ihi kuo nau fili ai ke tuku pe 'enau ngaahi me'alele maumau mo popo 'i honau ngaahi 'api kae 'oleva ke faingamalie. Pea ko e vaivai fakapa'anga tatau pe 'oku tu'unga ai 'a e 'ikai ke 'ave 'a e fakamaketi ki maketi kae fakatau atu pe 'i he ngaahi ve'ehala.



Kau ki'i talaatu 'eni, ko e ngaahi me'atokoni lahi mo faka'ofa'ofa koia na'a ke kai ta'e totongi ai pea tonu keke fakamatala mai he pepa ko e ngaohi me'akai ia 'a e ngaahi famili ko'ena 'oku kei tau si'enau ngaahi me'alele maumau honau ngaahi 'api pea nau fakamaketi he ve'ehala.



'Oku loi ho'o lave fekau'aki mo e ifi tapaka pe 'i fale kalapu. Na'a ku 'i he fale kalapu Siasi Tonga 'o Fakakakai mo Pukotala, Ha'apai 'i Sanuali 'oe ta'u ni pea 'i he ngaahi fale kalapu 'i Nuku'alofa, na'a ku fakatokanga'i 'a e 'alu ma'u pe 'a e kau ifi tapaka ki tu'a 'o ifi ki ai. Kuou fakatauange ke 'oatu 'e he 'Otua ha maama kiate koe, koe'uhi kake ka toe lava atu ki Tonga pea ke to'oto'o mai ha me'a 'oku lelei mo faka'ofo'ofa ke talanoa ki ai ka e'oua 'e ngaue'aki 'ae 'afungi mo e loi.



Tu'a 'ofa atu,

'Alifeleti Teau'imo'unga

teau100 [at] y7mail [dot] com