'Etita,

Kou lau hifo ho'o ongoongo ki he kau fakafoki atu ki Tonga 'oku kau ai e kau faihia fakapo (convicted murderers). 'Oku ki'i taka fakalilifu hono tukuange atu e fa'ahinga pehe ni ki Tonga. Kapau 'oku nau lava 'o fai he fonua lahi pea huanoa hake ki'i Tonga.

Ko 'eku fie'ilo mo e hoha'a koeha nai e ngaue 'oku fai ki he ni'ihi ko ia. Kuo tu'olahi e laaulea ki he ngaahi maumau kuo hoko pea 'oku kei hoko he fonua 'oku tuhu ko e fakatupu 'e he ni'ihi 'oku tipota'i mai mei muli. Ko e 16/11 ne tukuaki'i ne 'i ai 'enau kaunga ki ai pea pehe ki he ngaahi hia kehe.

'Oku 'ikai ke tukuaki'i kotoa kinautolu ka ko e ni'ihi pe 'oku nau fai e pango ko eni. Mahalo na'a 'oku taimi ke 'i ai ha senita 'i ha motu ke teu'i ai e ni'ihi ko eni ke fakafokifoki mai kinautolu ki he sosaieti kimu'a pea toki 'omai ke nau nofo he sosaieti.

'Oku totonu pe ke hanga 'e he ngaahi fonua ko ia 'oku tipota'i mai kinautolu mei ai 'o 'omai ha fa'ahinga tokoni ki he pule'anga Tonga kae 'oua 'e fu'u hingaki mai ki he fonua ke nau fua e palopalema. Kou tui 'e fai pe lelei taha ia e sosaieti ka 'oku 'i ai e ni'ihi ia te nau fakaloto'i e to'utupu ke nau toe fai ha ngaahi hia hange ko ia kuo 'osi 'asi pe ia he lolotonga ni. Kou tui ko e palopalema eni ke fai ki ai ha tokanga he'ene kei si'isi'i na'a lahi kae fiu feinga'i ke ta'ofi.

Faka'apa'apa atu,

Pola Loiti

polaloiti [at] yahoo [dot] co [dot] nz