Fu'u vave 'a e 2010 ki hano liliu 'o e konisitutone [1]
Friday, August 22, 2008 - 04:21. Updated on Thursday, September 11, 2014 - 16:17.
'Etita,
'Oku tau haka 'i he langi kuo tau he to'o fohe 'a Ha'amoheofo pea finangalo ai 'a Tupou V ke fai e liliu. 'Oku tau manatu kia King Siaosi Tupou I mo 'ene lalanga e Konisitutone, neongo ko Baker na'a ne fai hono fatu.
Ko e ta'u eni 'e 130 tupu e Konisitutone ko ia ko hono toki alasi eni neono 'oku te'ekiai ke fakahoko. 'I he tui vaivai 'a e motu'a ni ko e 2010 ia 'oku fu'u vave, pea 'oku ou faka'amu ke mamalie mo lelei e ngaue. Tuku pe longoa'a ia 'a e kau Temo he ko e me'a pe ia 'oku nau poto taha ai.
Ko Baker foki ko e faifekau pea mahalo na'a 'oku tonu ke fakahu atu mo ha faifekau pe takilotu mei ha fa'ahinga siasi pe ke kau he Komisoni ko ena ki he liliu ke 'oua na'a mavahe e lotu mei he fokotu'utu'u 'oku fai.
Ko e ki'i fokotu'u vaivai 'e taha ke tuku pe mafai 'o e Tu'i ke ne fili e fakataha tokoni mei ha kakai mei tu'a he Falealea mo e pule'anga 'oku ne finangalo 'oku nau fe'unga ki he ngaue. Manatu ko e kakai lelei taha ia ki he fatongia 'oku 'ikai ke nau fie ngaue fakapolitikale kinautolu ia, 'a ia pe ena 'oku tau sio ki ai he ta'u fili kotoa.
Malo,
Samiu Sika,
'Eua nofo 'ova 'i Aotearoa
samiusika [at] ymail [dot] com