Taau pe Lei mo e Tofua'a [1]
Tuesday, August 12, 2008 - 05:11. Updated on Thursday, September 11, 2014 - 16:33.
'Etita,
'Oku ou kole ke u hufanga atu 'i he Talamalu 'o e Fonua kae 'ataa ke hao atu 'eku ki'i fiefia ko'eni 'i he Katoanga fisifisimu'a, faka'ei'eiki melino mo fiefia 'a hono FakaKalauni 'a e La'aa Hopo hono Nima 'o e 'Otu Felenite.
'Oku ou fakamalo atu 'Etita kia te koe kae'uma'aa 'a e ngaahi kautaha ongoongo kehe 'i ho'omou uptate mai 'a e katoanga mahu'inga ni 'o mau si'i 'inasi ai 'a kimautolu ko'eni na'e 'ikai ke mau lava atu ki Tonga.
Fakafeta'i e Langi ma'a e katoanga ni 'o tatau pe 'a Natula pea mo e fonua 'a e kakai fiefia pea melino, pea mo'oni 'a e lea 'oku taka "Taau pe Lei moe Tofua'a" 'i hono ngaahi polokalama kotoa. Tautautefito ki hono Fakakalauni 'e he kau Taula'eiki pea Pani 'a 'Ene 'Afio Kingi Siaosi Tupou V. Pea hiva mai 'a e Maa'imoa hiva 'a e Tu'i 'a e Satoki Taula'eiki fakalangi pea mafola mai ki mamani, ko'ena 'a e fonua ko Tonga 'oku mau polepole ai.
Tauange ki he 'Otua mafimafi kene Fakalakoifie fuoloa mai hotau Hau, pea ke kei Tonga aipe 'a Tonga 'o tuputupu'a.
Faka'apa'apa atu
Molumalu 'o Ha'a Ngata
stuiivai [at] yahoo [dot] com [dot] au