'Etita,



Na'aku meimei falala kakato ki he kau fakafofonga Falealea 'o hotau fonua, 'a ee ne nau kaunga ki he 16/11, ke nau fakalele hotau fonua, 'okapau ne nau lototo'a fe'unga 'o tali, ne 'ikai mei tutu 'e he kakai, hotau Kolo, ka ko 'enau ngaahi malanga 'o faka'ai'ai e kakai ke fai pehe.

Kuo 'i ai eni ha to'utupu mo ha fa'ahinga tokolahi kuo nau 'i pilisone, he lolotonga ni, pea mahalo na'a hokohoko atu aipe 'enau nofo 'i pilisone, koe'uhi ko e hia ki hono tutu hotau Kolo. Ka 'oku ou fakame'apango'ia 'i he 'ikai to'a fe'unga hotau kau fakafofonga Fale Alea ne nau fekau'aki tonu mo e me'a ni, ke nau tu'u hake 'o tali 'enau kaunga 'i he me'a ni. Kapau ne nau pehe mai: Tukuange e kakai ke 'ataa, kae tuku ke mau fua 'emautolu 'a e hia kuo nau fai, he ne 'ikai te nau mei lotolahi ke faikovi, ka ko 'emau faka'ai'ai kinautolu; pea nau oo ai ki pilisone, 'o ngaue'i e hia 'a e kakai. Ko hai ia te ne ta'e'atu 'ene falala kiate kinautolu 'oka nau ka foki mei ai? 'Oku ou fakatauange pe, 'i he hopo 'oku lolotonga fai ni, 'o kau ki he tutu hotau Kolo, 'e to'a fe'unga 'a e kau fakafofonga Fale Alea ne nau fekau'aki tonu mo e me'a 16/11, ke nau tali 'enau kaunga ki he me'a ni. Koeha hano 'aonga ke te hao he Fakamaau'anga Fakamamani ka te toki fihia he Fakamaau'anga Fakalangi, 'a ee kuo pau ke tau maatu'aki e'a kotoa pe ai ke taki taha ma'u 'ene totongi 'o e me'a ne ne fai 'i he sino, 'ene lelei pe kovi.



'ofa atu mo e lotu,



Rev Dr Ma'afu Palu

palus [at] dodo [dot] com [dot] au