Tu'utu'uni 'a e Fakamaau'anga: 'ikai ke tali kole 'a e Pangikē Pule Fakafonua 'a Tongaˊ ke fakata'e'aonga'i e ngaahi fokotu'u 'a e Komisiona ki he Fakafepaki'i 'o e Ta'efaitotonu.

‘Oku lolotonga fakahoko ‘a e fakatonutonu ‘i he vā ‘o e Komisiona ki hono Fakafepaki’i ‘o e Ta’efaitotonuˊ (ACC) mo e Pangikē Pule Fakafonua ‘a Tongaˊ. ‘I he ‘aho 20 ‘o Mē 2025, na’e fakahū atu ‘e he Pangikē Puleˊ ki he Fakamaau’anga Lahiˊ ‘a e kole ke fakata’e’aonga’i ‘a e ‘eke fokotu’u ‘a e ACC ki he Fakamaau’angaˊ pē ko e konga ‘o e ‘eke ko eni makatu’unga eni ‘i he tu’unga fakalao ki hono ngaue’aki e mafai ‘o e ACC ‘i he malumalu ‘o e Lao ki he Komisiona ki he Fakafepaki’i ‘o e Ta’efaitotonuˊ.

“Na’e ‘eke’i ‘e he Pangikē Puleˊ ‘a e makatu’unga fakalao na’e fakahoko ‘aki ‘e he ACC ‘a ‘ene ‘eke faka-Fakamaau’angaˊ ‘o ngaue’aki e ngaahi fakamatala ne tu’utu’unia fakalao ke ne ma’u ki he’ene fakatotoloˊ ‘oku fehu’ia ai ‘a hono ngaue’aki tau’ataina eni ‘e he ACC ki he hopo. Neongo e mafai ‘o e ACC ‘i he Laoˊ ke ne ma’u mai ‘a e ngaahi fakamatala ke fakahoko ‘aki ‘ene fakatotoloˊ, ka koe mafai ke ne fakahoko ‘aki ‘a ‘ene ‘eke faka-Fakamaau’angaˊ pea ‘ikai ke ne ‘uluaki fakahā eni ki he Pangikē Puleˊ ‘oku ‘eke fakalao.”

‘I he ‘aho 30 ‘o Sune 2025, na’e tuku mai ai e tu’utu’uni ‘a e Fakamaau’anga Lahiˊ ‘a ia ne ‘ikai te ne tali ‘a e kole ‘a e Pangikē Puleˊ.

“Ko e fuofua taimi pea mo e tu’utu’uni eni ‘a e Fakamaau’angaˊ ‘i he Lao ki he Komisiona ki he Fakafepaki’i ‘o e Ta’efaitotonuˊ. ‘E ngāue’aki ‘ e he Pangikē Puleˊ ‘a ‘ene totonu ke kole ha ngofua ke fakahoko ha tangi ki he Fakamaau’anga Tangiˊ ke toe vakai’i ‘a e tu’utu’uni ‘a e Fakamaau Lahiˊ.”

Puipuitu’a ki he Fakatonutonuˊ

“ ‘Oku makatu’unga ‘a e Fakatonutonu Fakalao (Judicial Review) ‘a e ACC mo e Pangikē Puleˊ mei hono ‘eke’i ‘e he ACC ‘a e tu’unga fakalao ‘o e tu’utu’uni ne fakahoko ‘e he Pangikē Puleˊ ‘i Sepitema 2024 ki hono fakamanatua ‘o e ta’u 35 ‘o e Pangikē Pule Fakafonua ‘a Tongaˊ na’e fakahoko ‘i he ‘aho 16 Sepitema 2024ˊ. Na’e tu’utu’uni ‘e he Poate ‘a e Pangikē Puleˊ ke kau ki hono faka’ilonga’i e katoanga ‘a e hounga’ia pea mo e fakamālō’ia e fakahoko fatongia ‘a e kau ngāue ‘a e Pangike Puleˊ ‘o a’u ki hono ta’u 35 lolotonga e ta’u fakapa’anga na’e ‘osi ki he 30 Sune 2025, ‘aki ‘a hono foaki ‘o e me’a’ofa taki $5000 ki he tokotaha ngāue lolotonga kotoa pē, ‘o tatau pē mei he ma’ulalo ki he ma’olunga.

“Na’e ‘ikai ke kau ‘a e kau Talēkita ‘o e Poate ‘a e Pangikē Puleˊ ‘i he me’a’ofa ko eni ki he kau ngāueˊ pea na’e tali ‘a e tu’utu’uni ko eni kimu’a e katoanga hili hono fakapapau’i fakalao, ‘oku ‘atā fakalao ki he Pangikē Pule Fakafonua ‘a Tongaˊ ke fakahoko e tu’utu’uni ko eni.”

--

Sponsored Post #8597 promoted by the National Reserve Bank of Tonga, 8 July- 8 August 2025.