'Etita,

Kole faingamalie ni ke tau ki'i po-talanoa ai ki he ngaahi fifili 'oku fihi he'eku fakakaukau na'a lava hano tokonia. Pea 'oku makatu'unga 'a e ngaahi fakafehu'i ni, mei he tohi 'a e Tama Foa, 'i he Matangi Tonga 'o Fepueli 18, 2008. Kae tuku pe ke si'i fakahoko atu kita. Ko e ki'i Tama Nukunuku 'Amelika fiepoto au. Pea ko e 'uhinga ia 'o e fifili 'oku fai, ko e ngali kuo 'itengia si'oto fonua ohi 'a 'eni, 'oku fai ai e fakapaea ko e kumi faingamalie ma'ae famili, fonua, mo e siasi.

Me'apango he na'e 'ikai ke u ma'u hano liliu faka-Tonga 'o e tohi ni. Pea kou fakakaukau na'a ko e 'uhinga ia 'oku fai ai 'eku fifili ko e 'ikai ke u mahino'i lelei 'a e 'uhnga mo e taumu'a 'o e tohi, he 'oku fakapalangi ia. Kae tuku pe ke ta talanoa na'a toe ma'u ai ha 'ata fo'ou 'o e ngaahi kaveinga 'oku vivili mo mafatukituki hono mahu'inga kia kitaua Tonga.

Ne fai nai ha alea fakafetongi ngaue 'a e Taumalu'i Fonua Tonga mo e Pule'anga 'Amelika ki he folau na'e fai 'oku tu'unga ai e loto mamahi? Pe na'e fai 'eni ko e 'ofa fie tokoni ko e'uhi ko e fu'u kakai lahi faufaua, hange ko au, 'oku nofo tau'ataina he malumalu 'o e 'Ikale. Manatu ki he lau 'a e matu'a 'o e fuoloa, ' fai pe 'e koe 'a e ngaue lelei, he ko e tokotaha kehe ia 'oku ne fai hono fakapale'i.' Ka mahalo na'a ko e poto pe ia 'o e to'u moli-Tonga, 'ikai?

Ko au mo 'eku tui, kapau 'oku 'ikai fietu'u fakataha 'a Tonga mo 'Amelika ni ko e fehi'a mo fakafepaki ki he pule fakamalohi'aki 'a e fakailifia ...– terrorists ...– kae taumu'a faka'ekonomika, pea na'a 'oku saiange pe ha'ata nofo pe 'a taua 'o to manioke. Kuo faikehe e mahino ia he 'aho ni. Pea mahalo na'a ko e lahi 'a e 'ilo, he kuo 'ohovale e to'u tangata ia 'o e 'aho ni he mate 'a e sotia he mala'e tau. Pea kou tui ko e mamahi ia 'oku faingata'a hano fakana'ana'a ka mole e sotia ko ha feinga faka'ekonomika. Talamai 'e he Tohi, ' 'Oku 'ikai ha 'ofa 'e toe lahi hake ka ko ia 'oku tuku 'ene mo'ui ke mole ko e'uhi ko hono kainga . . .'

Ko e lave ko ia ki he fietokoni 'a e Pule'anga Siaina ke fakapa'anga 'a e fakalelei 'o Nuku'alofa, 'oku ta 'ilo nai 'a e taumu'a 'o e tokoni ni? Pe 'oku hange pe ko 'eta folau ki Iraq, ke fakalea tokoni pe, kae taulani mai 'i mui 'a e mo'oni ia 'oku fakatutue 'ofa. Pea neongo e nima homo 'a Siaina he fa'a kole silini, te'eki ke u fanongo au ha Tonga kuo fie Siaina. Pea kataki pe 'o fakatonutonu mai au, ka ko 'eku kei tupu hake, na'e fie 'Amelika e Tonga ia. Hei'ilo ki he taimi ni mo e fakalakalaka . . .

Ko e kaveinga ko ia 'o e ngaahi mahaki 'oku faingata'a'ia ai 'etau fanau mo e hako tupu 'o Tonga, 'oua na'a ta tuhu ki ha taha kehe. Ta ki'i tangutu si'i hifo 'i loto fale mo 'eta fanau 'o toe sio fakalelei pe 'oku taumu'a e famili Tonga, mo 'ene folau he taimi ni ki fe? Ko e nunu'a 'eni 'eta holi ki he fakalakalaka, 'oku mahaki'ia ai 'a e to'u tangata 'o e 'apongipongi. Ta ta'ofi 'e taua 'a e kakano'i manu kae faka'ata 'a e pa'umutu ia ke hu ki Tonga. Ko e ha hano faito'o? Talamai 'e he Himi; ' Ko e ha 'a e vai koloa? Ta'ata'a pe 'o Sisu . . .'

Faka'apa'apa atu,

Mohetau Kasitati.

mmkasitati [at] aim [dot] com