Miss Galaxy [1]
Wednesday, July 18, 2007 - 11:28. Updated on Tuesday, September 10, 2013 - 18:44.
'Etita,
Fakamolemole ka e hao atu mu'a 'ete ki'i fakakaukau ki he fe'auhi Galaxy 'i ho'o kolomu. Kuo lahi e laulea ki he natula 'o e fe'auhi ni 'o 'ikai ke fenapasi mo e taumu'a ngaue (objective) 'a e kulupu ni. 'Oku ou faka'apa'apa lahi ki he tui .'a Moimoiangaha pea 'oku 'i ai pe 'ene totonu ki ai. Kaikehe 'i he senituli sivilaise ni, kuo faka'apa'apa'i fakamamani lahi ai 'a e totonu 'a e tangata (human rights) pea 'oku kau ai 'a Tonga.
'Oku fakalele si'i fe'auhi Galaxy ke ne paotoloaki 'a hono faka'apa'apa'i e to'onga mo'ui mo e totonu 'a e kau fakafafine, 'i honau ngeia faka-'Otua ko e tangata na'e fanau'i mai ki mamani 'i hono 'imisi tapu, pea ho ki ai .'a e manava mo'ui 'o tatau kia kitautolu kotoa pe. 'I he'ene pehe, 'oku 'i ai 'a e totonu ia 'a e kau fakafafine ke nau ongo'i malu mo tau'ataina ki he'enau to'onga mo'ui 'i he Sosaieti 'oku nau 'i ai. Ko e tau'ataina ko 'ete fakahoko 'ete fiema'u 'i loto 'i he tu'utu'uni 'a e lao pea 'oku pehe tofu pe si'i tau'ataina 'a e kau fakafafine ki he'enau Galaxy. 'Oku 'ikai ke fakamalohi'i he'e Galaxy ia 'a e kakai ke nau lava ange ki he'e nau ngaahi polokalama, ko e fili fa'iteliha pe ia 'a e kakai pe 'oku nau fie kau ki ai pe 'ikai. Hange kia au kuo fu'u manakoa 'a e fe'auhi ni ki he kakai 'o e fonua he 'oku lauafe pe kau mamata ia 'o a'u ki he ta tuku.
Ko e ki'i fokotu'u fakakaukau pe ki he Galaxy, ke fakangatangata 'a e ta'u motu'a 'o kinautolu 'oku hu ki loto (R 18) ke 'oua uesia 'e he ngaahi to'onga fieoli 'a e kau fakafafine 'e nau ngaahi ongo. Ko kitautolu pe foki ia ke tau fakapapau'i 'oku 'ikai ke tau fehangahangai moha tau tapu pe faka'apa'apa 'i he fe'auhi ni. 'I he'ene pehe leva, 'e 'ikai ha femamahi'aki pe ha useisa kovi ki he to'utupu 'o e fonua mo kinautolu 'oku 'ikai ke nau tui tatau mo e kau fakafafine.
Moimoiangaha, ko si'eku lea ni he a'usia tonu, hoto ki'i 'uhiki 'oku fakafafine, pea taumaia ke mou mea'i 'a e ongo ki he manava 'o e fa'e, si'ono li'ekina, lumoluma.'i, tukulalo'i, siokovi'i mo ta'efaka'apa'apa'i e ngeia 'o e fanau ni. Ko e to'onga mo'ui 'oku 'ikai tali he'e Sosaieti ka e taumaia 'oku faingofua hano fulihi. Ko 'eku me'a pe 'oku fai ko e 'oange 'a e 'ofa mo e poupou pea te si'i tu'u pe 'o lele mui mo keke noa'ia he si'ene fiefia. Fakamolemole ka tau lotu pe mu'a mo 'ofa'i si'i fa'ahinga ni pea tuku pe mu'a ke lele 'a e Galaxy he ko si'enau fieoli fakaoli pe ke ma'u e fiefia 'a e matanga.
Faka'apa'apa atu
Telesia Finau
direction2u2 [at] xtra [dot] co [dot] nz