'Etita,

'Oku ou kole ai pe ke u hufanga atu 'i he talamalu hotau fonua kae 'ataa mu'a ke fai atu ha fakalavelave.

'Etita 'oku ou fakamalo atu 'i ho'o kolomu fakamuimui ko'eni 'i ho'o fakama'opo'opo e mahina 'e taha kimu'a 'i he 'aho 16 'o Novema.

'Oku totonu ke tau 'aa hake a Tonga 'o 'ilo pea fai mo ta'ofi 'a e mahaki ko'eni ko e Temo 'oku lolotonga mafola 'i Tonga. Ko'eni kuo nau feinga ke to'o e tukufakaholo ki he kelekele, 'oiaue !! 'oiaue!! ko 'enau alasi pe 'a e 'etau koloa mahu'inga ni ko 'ene holofa ia hotau fonua mo hotau tukufakaholo . Te'eki ke u sio 'i he fokotu'u fakavalevale lahi. Pea nau toe tukuaki'i ko e loto ia 'o e peseti 'e 98 'o e kakai, koe tohi tangi na'e fakamo'oni kiai e toko tahaafe tupu, te'eki ke u sio 'i he hala lahi mo e loi lahi. Kuo nau mahafu 'aki 'a e loto 'o e kakai ke fakafotunga 'aki 'enau fanga ki'i fokotu'utu'u pukupuku mo siokita. Tonga ee !! ka 'ikai ke tau 'aa 'e hoko 'a e ta'emaau lahi 'i he fa'ahinga kakai siokita mo fakavalevale pehe ni ke nau taki kitautolu. 'Oku kei fakapotopoto ange pe 'a e fili 'ehe Tu'i 'a e kakai maama mo fakapotopoto ke nau leva'i hotau ki'i fonua masiva.

'Oku ou 'ilo fakapapau 'oku kei longo 'a e kakai poto fakapotopoto lahi, kakai lotu, kakai mamahi'i mo ngaue'i hotau fonua talu mei tuai, ka ko e ki'i tokosi'i ta'e fakapotopoto, fiepoto, mo kaaimu'a tokosi'i eni 'oku nau kailao takai holo pea kuo haa pe honau poto he taimi ni kuo tau too kotoa ki he tu'utamaki 'i he 'enau ngaue. Koia kuo taimi ke ta'ofi kei taimi.

Fokotu'u atu ki he Palemia mo e Pule'anga 'uluaki fai ha referendum (filifakahaha loto fakafonua) 'i Tonga na pea mo muli ni ke ma'u e loto totonu 'o e Kakai, 'okapau 'oku loto e tokolahi ke liliu pea toki fakahoko 'a e liliu pea ka 'ikai pea tuku 'o 'oua 'e fai ha liliu mo e fakapiko.

Ko e talanoa ko'ena na'e fai 'e he komiti 'a e NCPR na'e fai mai ki Senee ni te u fakataataa 'aki ia mahalo koe .02 % 'o e kakai Tonga 'i Senee ni na'e lava atu ki he fakataha koia ka 'okapau 'e fai ha referendum 'oku ou tui 'e ki'i ofiofi ange ia ki he mo'oni pea 'e tokolahi ange 'a e peseti 'o e kakai 'e kau kiai tatau pe 'i muli ni mo Tonga.

'Oku tau kei ma'uma'uluta ko hono kei ha'i kitautolu 'e he nonofo 'a Kainga mo e nonofo faka 'Ulumotu'a pea taavani 'aki 'a e Lotu fakakalisitiane, pea fai ai 'a 'e tau feveitokai'aki mo e tauhi vaha'a, taki taha fetaangutu'i 'i hono ki'i 'api kuo foaki ta'e totongi mai 'e he Tu'i, pea tuku fakaholo ai 'ete fanau mo e makapuna. Pea takitaha tauhi ai hono fatongia kehekehe, fiemalie pe 'a kinautolu ne fa'ele'i mai ke si'isi'i he 'oku mahino ko e 'api 'e tukufakaholo 'i he lahi pea ko e lahi 'e tu'utu'uni pea 'ofa ki he si'isi'i 'oka 'oku malava, fiemalie pe si'isi'i ke kumi ha'ane mo'ui 'oka 'oku si'isi'i 'a e kelekele feinga mai ki muli ni 'o kumi mo'ui 'ai 'o kei tauhi atu pe fatongia ki Tonga.

Koia 'oku tau kei melino pe kitautolu pea tau fiemalie 'i hono taki kitautolu 'e he hako 'o Tupou I, te u kataki'i ange 'a e maai'imoa pisinisi 'a e Fale 'o e Tu'i 'i he koloa 'a e fonua 'i ha va'inga 'a Sangster pe ko Tu'i Uata 'i Tonga 'i he kaha'u.

Faka'apa'apa atu

Molumalu 'o Ha'angata

stuiivai [at] yahoo [dot] com [dot] au