'Etita,

Fakatapu ki he Tu'i 'o e Langi ne tuku ki ai e fonua ko Tonga 'e he He'ene 'Afio ko Siaosi Tupou 'Uluaki.

Fakatapu atu ki he 'ene 'Afio, Siaosi Tupou V

Pea fakatapu atu ki he ngaahi tu'unga kotoa 'oku totonu mo fa'a fakatapua 'i he ha'ofanga kae 'ata mo'oku e faingamalieni ke fai atu ha fietokoni fiematamu'a mei he fu'u maka ko Tutu'ila 'o e tu'i Manu'a.

Kuo fafangu kitautolu 'e he 'aho 16 'o Novema ke tau 'a 'o vakai'i e tu'unga 'oku 'i ai 'e tau nofo fakafamili, fakakolo mo fakafonua foki.

Ne fu'u fuoloa ta'u 'e tau katoanga inu mo kai, sealue mo 'ai'ai lea he kakava mo e kalofiama 'o e mafimahi 'o e kuohili pea ta'omia mo mo'ungaloa ai 'ia kitautolu 'oku 'i ai hotau ngafa ke tau tanaki ki he mafana pea faka'asili e laumalie lelei kuo tau anga unga mo fiemalie ai.

Hou'eki 'o e Fonua: Kuo fuoloa ho'omou vamama'o mo homou kainga pe kakai. Ko e tokolahi 'o kinautolu 'oku 'ikai ke nau lave'i pe ko hai koa honau Nopele pe Hou'eiki. Pea ko e tokosi'i 'o kinautolu 'oku nau lave'i pe ho mou hingoa kae te'eki ke lave'i pe 'ilo'i ho mou fotunga pe fofonga, tapu mo kimoutolu.

Ko e taimi kotoa pe 'oku ofi ai 'eku fononga ha falelotu 'oku ou feinga ke u 'a'ahi kiai. Ko 'eku fakaamu ka hili 'a e nofo ko'eni 'e 'ikai 'eke 'e Sangato Pita pe kohai au 'i ha'aku foki atu. Na'e fakaoli e talanoa mo e kau Nopele 'e ni'ihi he taimi ne talaatu ai ho nau tufakanga ki he me'a faka'eiki 'o Taufa'ahau Tupou IV. 'Oku fakahua 'aki e ta atu e Hou'eiki ia 'e ni'ihi ki honau kakai 'oku 'ikai tali mai e telefoni pea ko e telefoni na'e tali ne 'ikai ke nau maheni kinautolu mo e le'o 'o honau Nopele. Pea ko e pehe ke kehe ola ko e toki 'ilo'i pe kita he kavenga.

'Oku ou fakamantu atu heni ki he Hou'eiki 'o e fonua kapau 'oku te'eki ke mou fakatokanga'i. Kou mole atu 'emau fanga kui na'e tali ko au, ko ia, mo ko e ta'efehu'ia kimoutolu. Kuo kamata ke pulia atu moe 'e mau fanga tamai ne ngulungulu pe kae kei fai pe ho'omou 'umu. Ko e kuonga 'eni kuo ke he. Ko e fanau tupu 'oku nau fiema'u ke fakamo'ui e ongo kauhala fakatou'osi. 'Oku fiema'u ia ke kei hoko pe ho'o tanaki 'au

Hou'eki, kae 'oua 'e ngalo ke 'i ai ha taimi ke hu ai mo e tufa he 'oku 'i ai pe mo 'eku kavenga.

Ko e kole fiematamu'a kia Pilinisi 'Aho'eitu 'Ulukalala ke ke ta mu'a 'e koe e 'uluafi. Ka hili e Po 100 'a e La'a kuo To, pea ke 'eva ki Vava'u 'o fakamalo ki ho kainga he ngaue lahi kuo lava. Kapau leva kuo me'a atu ki he ako, pea tukupa ha 'aho 'i ha'o toe me'a hifo ki Tonga ke fakahoko ai e kole 'oku fai atu mei he motu'a ma'u lalo ko'eni. Ka fiema'u, pea ke me'angaue 'aki e motu'ani 'i ha'o me'a ki Vava'u, tatau tefito ki Tu'anuku. Ka lava 'eni, 'oku ou fakapapau atu teke Saliote pe homau uma 'o lauikuonga.

Kapau 'e taku 'eku fakahoha'ani ko'eku laulaunoa mo e fieme'a, 'oku ou kole kia Hou'eiki ke manatu'i ange lesoni ne ako 'e he fonua hau ko Amelika mei he kau tau na'anau hao mo'ui mei 'i Vietinemi he faka'osi'osi 'o e tau he 1975. "Ko homau malu'i na'e 'ikai ha'u ia mei he Tau Tahi, Laula Puna, pe ko e ko'etau ngaahi Vakatau mo 'enau me'atau fakaeonopooni. Ko'emau mo'ui na'e 'ikai lava malu'i ia 'e he kau Polisi mo'enau mahafu mo honau ngeia. Ko 'emau hao mei he mate na'e tu'unga 'ata'ata pe ia mei he toka'i moe anga 'ofa 'ae kakai 'o e fonua."

Ko e lelei 'o e kaha'u 'o Tonga 'e tu'unga ia mei he toka'i mo e 'ofa'i kimoutolu 'e homou kakai.

Tu'a'ofa Atu.

Mafi 'o Amerika Samoa Lousiale Kava.

slkava [at] samoatelco [dot] com