'Etita,

Tulou! Tulou! Tulou!

Tapu mo Ha'a Moheofo, Ongo 'Apa'apa 'o e Hau, Ha'a Matapule, kae 'uma'a Ha'a Lotu, talangata 'iate kita 'o fai ki tu'a mama'o kau tatau atu a he'.

'Oku 'oatu 'a e kole fakamolemole mei he Tano'a 'a Loa'u' ki he Tonga kotoa 'oku taka 'i he tapa 'o e kolope 'oku feohi he feangiaki 'a e Matangi Tonga'. Tuku mai mu'a e ki'i faingamalie ko 'eni' ke faka-kakato atu e Taalanga'i 'o Loa'u', pea kataki pe kau No'o Tapa'igatu mo hu Louifi atu. 'Oku ou kole ke u hufanga he 'Api ko Ma'ananga kae fakahoko atu hoku fononga'.

Kapau na'e 'i ai ha lea 'e maahehei pe lavea ai ha ngaahi loto, 'oku 'oatu 'a e kole faka-molemole mei he motu'a ni pea 'oku ou kole fakamolemole atu foki heni ki he ngaahi ha'ofanga kotoa pea 'oku tefua ai e kau tangata ko e pukepuke 'o e fonau'. 'Oku ou kole fakamolemole heni ki he Palesiteni 'o e Tano'a 'a Lo'au' kapau kuo fai ha fakafeangai 'o hange 'oku 'ikai ke akoi' kae tuku pe mu'a ke u fua pe hoku Kolosi'.

'Oku 'oatu e fakamalo mo e kole faka-molemole ki he pule 'o e Matangi Tonga' ko e faka-ngofua ke fai e felafoaki 'i hono mala'e taalanga'. 'Oku fie faka-ha atu 'a e 'ofa lahi ki he fofonga 'o Tofu'ipangai' mo e Fekumi 'a Lo'au' 'Api ko Ma'ananga 'i hono faka-tuia mai e faka-vaha'a 'uhinga 'a e Lulutai'.

Pukepuke pe mu'a ha ki'i lelei ne ma'u he talanoa tu'a ni, pea faka-monuka atu e ngaahi fehalaaki ia ka tau hanga pe ki he Langa Fonua 'oku tau fai'.

'Ofa atu ki he kau taukei 'o e ngaahi mala'e tau malu'i fonua,' Sefita Hao'uli, 'Ofa ki Tonga, Sailosi Finau, Sione Lousiale, pea pehe ki he Matanga'.

'Ofa atu he 'ikai ngata mei he pupunga Lulutai 'o e Tano'a 'a Lo'au, Lennox
California, USA

Siosaia Moimoiangaha