Kingi Taufa`ahau Tupou IV [1]
Friday, August 18, 2006 - 08:43. Updated on Friday, September 26, 2014 - 04:06.
`Etita,
`Oku ou fakatauange pe `e `i ai si`a faingamalie ke fakahoko atu mu`a `a e tohi `ofa ni `i he ngalu`ope, pea `oua mu`a na`a si`i taku ko ha fiematamu`a pe ko ha ngutu tamulea.
`Oku ongo faka`ulia ki he motu`a tu`a ni `a e fakahoko mai ko ia `a e popoaki ki he fonua na`e fai `e he Palemi`a `o Tonga, Dr Feleti Sevele, fekau`aki mo e pupuluhi `a `Ene `Afio, Taufa`ahau Tupou IV, ko e Hau mo e Tu`i `o e `Otu Tonga. `Oku lotua `e he kakai Tonga kotoa pe `i he tapa `e 4 `o e kolope `a `Ena `Afifio `i he taimi faingata`a ko `eni, mo tangi ki he Langi ke hifo mai `a e `alo`ofa `o e `Otua Mafimafi `o fakalakoifua Ho`omo `Afifio, pea foaki atu `a e nonga mo e fiemalie `a Kalaisi ke feohi mo Ho`omo `Afifio.
Na`e hili `a e maa`imoa ako `a e Tama `i `Aositelelia, pea ne foki mai ki Tonga `o hoko ko e fetu`u `esiafi `i hono tataki mo kaufaki`i `a Tonga mo hono kakai mei he kuonga `o e fakaikeika `o e loki ako `o Ne fataki `a e fonua mo hono kakai ki he `aho`aho mo e ho`ataa malie `o e poto faka`atamai pea fakaava `a Tonga ki muli mo mamani lahi.
Lolotonga `i He`ene `i he Taloni, na`e hokohoko atu pe `Ene ngaahi maa`imoa mo `Ene ngaahi feinga kehekehe ke fakalakalaka aipe Hono kakai pea kei paotoloaki aipe mo langa hake `a `eni fonua, ka ko Tonga. Kuo tau`ataina kakato `a Tonga pea kau he lau pea lau `i he kau `i he mamani.
`Ofa ange ke fakamalumalu mo fakalakoifua `a e `Afio na `e he `Otua `o `Epalahame pea mo Sekope, pea ke `atakai`i foki `a e `Afio na `e he kau `angelo mo e kau hosite `o e Langi.
Tu`a `ofa `eiki atu
'Ofa-ki-Tonga
ofakitonga [at] comcast [dot] net