Tuku 'a e ivi ke teuteu ki ha Tsunami [1]
Thursday, August 17, 2006 - 08:02. Updated on Friday, September 26, 2014 - 03:57.
'Etita,
'Oku ou kole 'Etita ke kau atu mu'a eku faka-kaukau ke 'i ai ha ngaue ki he fonua he 'oku fu'u mahu'inga ia kiha hoko mai ha faka-tu'utamaki fakaenatula.
Talu meihe ta'u kuo 'osi mo e hokohoko 'a e mofuike he fonua 'o a'u eni kihe ho'ata ko'eni.
Kuo lahi 'etau sio kihe ngaahi fetukuaki he fonua kae ngalo ha sio ki ha hoko mai ha Tsunami 'o tau fetaulaki moia. Sai a 'Eua ia mo Vava'u he ko e fonua ma'olunga ka ko e hoko mai ki Tongatapu mo Ha'apai mahalo ko e puli ia he moana.
Tau vakai ange kihe mofuike ne hoko he konga kimu'a 'o e ta'u ni ne 'ikai toe mohe ha loto fale ka na'e 'a kotoa o fakaongoongo mahalo na'e pahia a Sisu he kaila mo e kole tokoni pea ne iku palopalema ai 'a e otu Ha'apai, pea puli pe malohi koia 'oku 'ikai ha toe tokanga ke fai ha teuteu ki ai.
Kuo 'i ai foki 'a e Potungaue mo e ngaahi kautaha 'oku nau fai ha tokoni kiha fakatu'utamaki fakaenatula, ka kuo 'ikai tenau toe 'asi mai he TV pe Letio ke fai ha talatalanoa koeha ha teuteu 'a e Pule'anga mo e Fonua ka hoko mai ha faingata'a fakaenatula he hokohoko ko'eni 'a e mofuike.
Tau tokanga na'atau toki 'ahake ha 'aho kuo tau tete he moana.
Malo
Lapulito
pulotuilavalu [at] tonfon [dot] to