Tuku e tuhutuhu he ko e anga ta'e taau [1]
Monday, July 24, 2006 - 16:31. Updated on Friday, October 17, 2014 - 14:39.
'Etita,
Tuku mu'a e ki'i faingamalie ko 'enii' ke fai atu ai ha ki'i tokoni ki he fanga tokoua mo e fanga tuofafine 'oku talanoa lolotonga 'oku 'ata' e lotofale 'o e Matangi Tonga ke fai ai ha poolave faka-famili.'
Kuo lahi faufaua 'a hono tu'uaki 'a e melino mo e lotu' 'i hotau ki'i fonua', 'i he ngaahi 'aho kuo maliu atu' 'oku hange kuo faka'ikai'i 'a e fo'i mo'oni ko 'eni'. Ko e ngaahi (talanoa) taalanga kuo fai' neongo ne fai e tau'aki fakamahino 'uhinga neongo e ('ikai lolo tatau) ta'e felotolotoi, 'oku ou pehe kuo taimi ke ta'ota'ofi 'a e (tuhu) tau lau' he ko e anga ta'e faka'apa'apa ia pea kuo mole 'a e fo'i 'uhinga malie 'o e talanoa'. 'Oku ou 'ofa lahi ki he tangata ko Sefita Hao'uli he kuo fu'u lahi 'a hono 'ohofi mei he ngaahi tapa kehe kehe 'o e kolope.
Na'e lave 'a S. Mokofisi ki he "tau'ataina fakafo'ituitui", S. Kava ki he "lototaha ke ta'e felotolotoi" pea kuou pehe kuo tau a'u ki he mahino'. Ko e tau'ataaina ki he takitaha (tau'ataina) fakakaukau 'oku 'ikai 'uhinga ia 'oku tapu ke lea ha taha ki hono loto 'o tatau ai pe pe 'oku tonu pe hala ko e fo'i totonu ia 'a e fakafo'ituitui koia'. Ko e femahino'aki kae ke tui kehe kehe pe 'oku tau 'inasi tatau ai he ngaahi tui Faka-kalisitiane'. 'Oku tau tui 'Otua kotoa pe ka 'oku tau takitaha tu'uaki pe 'etau mo'oni. 'Oku lahi 'a e kakai 'oku 'ikai ke nau tui 'Otua pea ko e tau'ataaina ia 'a e kakai koia', pea 'oku 'ikai ha totonu ia 'a ha taha ke fehi'a ki he kakai koia'. Ko e taufehi'a' ko e 'ulungaanga ia 'o e Tevolo' pea kapau he 'ikai ke tau tokanga te tau toe fihia pe ki he fa'ahi 'oku tau tukuaki'i 'oku ta'e (totonu) mo'oni'.
'Oku ou kole atu ke si'i fakatau'ataaina mu'a e ngaahi loto ki ho tau tokoua ko Sefita he 'oku 'ikai ke u tui ko ha'ane fokotu'u ke tau kee pe fuhu, ko e fokotu'u pe 'a 'ene (mo'oni) tui ke tau sio ki ai pea koia 'oku 'ikai tui' pea puke pe ho'o mo'oni'. 'Oku hoko foki 'a e ngaahi fokotu'u he taimi 'e ni'ihi ke tau lava 'o sio ki he ngaahi tafa'aki 'oku 'ikai ke tau ma'ausiaa'.
'Ofa lahi atu kia kinautolu kuo vave 'a e taa honau mafu tupu pe he malohi ange 'a e 'ita he loto lelei mo mahino'. 'Oku 'i ai 'a e fakahinohino tokua kapau 'e 'ita ha taha 'o a'u ki he too 'a e La'a' pea 'oku hala ia 'o laka hake 'iate ia na'e 'uluaki hala'. Ko e 'aho Sapate 'eni pe ko e fakahinohino 'a e Faifekau 'o e potungaue "'Ofa ki ho kaunga'api 'o hange ko ho'o 'ofa kiate KOE'.
'Ofa atu
Siosaia Moimoiangaha
siatahi [at] yahoo [dot] com (mailto:siatahi [at] yahoo [dot] com)