'Etita,

Tangata'eiki kataki keu kau atu mu'a he fakahoha'a ki he ngaahi malie 'oku hoko hotau fonua. 'Oku malie ngaahi ngaue koe'uhi 'oku 'ikai ke fu'u mahino kohai e sulu 'oku fai ki ai e faiva. Kuo lava atu e fu'u laka ne pehe ko e laka melinoo 'i he teke ai pe 'o e liliu. Kimu'a pea kamata e laka ne tu'u mai e PSA 'o uki e laka, peau pehe koe sulu ia. 'Osi pe ngaahi 'aho kuo pavaki mai 'enau fokotu'utu'u minisita...ko kinautolu pe ia 'o taki mai ai e sekelitali fakataimi. 'I he mahino hono fokihi 'e he felafoaki moe media ne nau holomui kae hu mai e kau sulu 'a e Temo 'oku taki ai e kau fakafofonga 'o liu ki ai e lakaa, neu pehe mahalo ko e kau sulu e 'oku fai ki ai e faiva. 'I he 'aho laka ne lolotonga e tatali ki he taimi ne teu ke fai ai e laka kuo hu hake e paati ia, 'a Tei mo Misi (poli malolo) 'o kalanga ke fai e laka pea lea kovi ki he kau 'ofisa melino mo e minisita. Neu pehe malao ko e kau suluu e 'oku fai ki ai e faiva. 'Osi atu e ngaahi 'aho kuo faka'ilo 'e he Nopele ia 'e taha mo e kau fakafofonga 'e ni'ihi e sea, palemia, moe falealea pehe ne ta'efakalao e huufi e falealea. 'Osi pe ngaahi 'aho kuo nau toe loto ke tuku e hopo kae alea'i e patiseti. 'Ita mai e palemia ia mo e kau faka'iloa 'o tuku pe ke hopo. 'I he taimi tatau ko e ongo TV ia 'oku 'i ai 'enau taki tolu. 'I ai e ki'i tokotolu mei he TV 'e taha hange koe toko tolu fakaoli 'oku nau lau ki he pule'anga pea toe 'i ai e toko tolu ia mei he TV 'e taha 'oku nau hapo mai nautolu ki he tafa'aki 'e taha. Ko ia hange 'oku ki'i nofo 'i lelenga 'eku fakakaukau pe kohai koaa 'oku fai ki ai e faivaa. Ko e tu'u he taimi ni 'oku nau kei tau'aka pe mo taukalate , pea nau toe to'o kaulei pea 'i he taimi 'e taha 'oku nau ki'i tui piva. Ko ia ai teu toe ki'i tatali pe 'o siosio lelei pe kohai koaa 'e fai ki ai e tuii.

Faka'apa'apa atu,

Pola Loiti

polaloiti [at] yahoo [dot] co [dot] nz