'Etita,

Kataki kae hao atu mu'a e ki'i fakahoha'a ni. Kuo kamata ke failaa e vaka 'o e liliu 'i Tonga he kuo kamata ke 'asi mai hono ngaahi fua. Ko e me'a 'oku ou fakatokanga'i ko e kau teke liliu pe eni 'oku nau toe fakafe'atungia'i e nga'unu 'a e vakaa. Talu hono fili 'o Dr. Feleti Sevele ke ne minista mo e tafoki hake hono kaunga fakafofonga 'o fakaanga'i 'ene ngaue. Fili 'o palemia le'ole'o toe le'olahi ange kalanga 'a Clive Edwards he OBN 'o pehe ko e tangata hala. Toe hoko mo hono fili ke ne palemia 'oku 'ikai pe loto ia ki ai pea pehe ki he ni'ihi e kau Temo. 'Ikai ko e konga ena e liliu ke palemia ha taha mei he kakai? Kohai 'oku mou toe loto ki ai? Mahalo na'a 'oku sai ange pe 'a 'Isipite moe kau'i koane.

Sai fokotu'u 'i fale 'e he Tu'i Pelehake ke fokotu'u e komiti ke ngaue ki he liliu. Hiki nima kotoa e kau fakafofonga e kakai he ko e Tamaa 'oku pataloni he komiti Temokalati. Feinga pe Tamaa(tapu mo ia) kumi e pa'anga ki he'ene komiti pea 'omai e kau mataotao. Vakai ange aa, Dr. Sitiveni Halapua, Dr. Langi Kavaliku, Dr. 'Ana Taufeulungaki, ko eni kuo toe tu'u mai pe kau fakafofonga ne nau hiki nimaa , 'a 'Aki, 'Isi, Polo mo Liti 'o tala tokua kuo afe komiti mei he taumu'a. Pehe tokua kuo nau 'osi fai e ngaue ko ia 'oku fai 'e he kau tama ko eni. 'Oleva hono 'olaa he 'oku kei hihi. 'E faingata'a ki ha taha ke 'alu mo 'ene taumu'a ke fanongo ki he le'o e kakai, 'e kei tu'u pe 'ene fakakaukau ia 'ana hange ko e me'a 'oku fai 'e 'Aki mo 'ene kau temoo.

Mou kataki kau Temo fakafofonga, 'oua te mou ilifia na'a mole homou mana, ka mou ki'i tali hifo ke kakato e ngaue he kuo kamata ke ha hono olaa. Mou ki'i kenu atu he Shoreline he koena 'oku te'ekiai ui e hopoo kae tuku e ngaue 'a e kau tama koee ke lava. Koefe liliu 'oku mou tui ki ai, 'ai pe politikale ka e tuku e fiema'u vivili 'a e kakaii. Faifai malie hono olaa kae 'oleva ke 'osi hono hihii ka tau toki kai fakataha.

Faka'apa'apa atu,

Pola Loiti,

Otago

Lolotonga 'i Veitongo

polaloiti [at] yahoo [dot] co [dot] nz (mailto:polaloiti [at] yahoo [dot] co [dot] nz)