Malo e Lelei Pesi,

Ko e ki'i kolo eni 'oku ne fili 'a Tonga ke nau talitali ko honau fonua lolotonga 'o e sipoti (Adopt-a-Nation).

'Oku houa 'e 6 'a e drive mai mei Melipoane. 'Oku lolotonga 'i heni foki 'a e timi 'Akapulu toko 7 pea 'oku fakamafana 'a e 'ofa'i kinautolu 'e he kainga Tonga 'oku nau 'i he ki'i kolo ni. Te u fakafuoufa pe 'oku nau ofi pe ki he toko 500 tupu. Ko e feitu'u ni foki 'oku 'iloa ia ki he lahi taha ai 'o e ngaahi faama kalepi, moli mo e ngaahi 'akau fua kehe pe pea 'oku mo'umo'ua pe he taimi lahi 'a e kakai ki he toli 'o e fo'i'akau. 'Oku ngaue fakataha 'a e Kosilio 'o Mildura pea mo e kainga Tonga ki hono tauhi mo e tokanga'i 'o e timi pea 'oku tatau mo e ha 'a e manakoa 'o e timi 'i Mildura.

Ko e fakamalohisio kotoa pe 'oku cover ia 'e he local TV mo e media pea ko 'aneafi (Tokonaki 4 'o Ma'asi) na'e fakahoko ai ha ako va'inga mo ha timi local pe pea na'e mamata'i 'e ha kau Tonga mo e kaki pe 'o Mildura. Na'e fakahoko 'e he kainga Tonga heni 'o taki mai 'e Kalisitiane Finau (Palesiteni 'o e Kalapu Hufanga 'o Tonga) mo Soana Vaka'uta, Saia fangaloka mo e kainga Tonga tokolahi 'a e koniseti mo e li pa'anga ma'ae fanau va'inga pea na'e ma'u ai 'a e $9,000 tupu.

'Oku lava atu 'a e fanau 'o lotu he ngaahi fai'anga lotu kehekehe pe he 'aho ni pea 'e fakahoko ha pohiva lotu fakamavae he efiafi ni kimu'a pea foki 'a e timi ki Melipoane 'apongipongi (Monite 6). 'Oku mo'ui lelei pe 'a e fanau va'inga (tukukehe pe 'a Vungakoto Lilo 'oku ki'i lavea hono 'ate'iva'e). 'Oku taki mai 'i he timi 'a Quddus Fielea (Pule), Manu Vunipola (Faiako) mo 'Isi Fatani (Tokoni Faiako). Ko Kuea Kolokihakaufisi 'e toki tu'uta hifo ia ki Melipoane 'apongipongi fakataha mo e Physio.

'Ofa atu

Takitoa Taumoepeau

Chef de Mission - M2006

Team Tonga

XVIII Commonwealth Games

govprint [at] kalianet [dot] to