`Etita,

Ko e toki ongo fakamamahi kuo a`utaki mai fekau`aki pea mo e `eiki n_pele ma`u tofi`a tukufakaholo ko Veikuné, `i hono to`o `a hono hingoá pea paki mo hono ngaahi faka`ilongá `o mole ai `a hono fatongia ko e Sea `o e Fale Aleá.

`Okú te nofo mo fakakaukau atu ki he `Uluaki Faa `i he taimi na`á ne hanga ai `o toe fokotu`utu`u `a e fonuá, hili ia `ene fakatahataha`i `a e ngaahi vahefonuá pea mo e ngaahi ha`á. `Okú ou fakakaukau atu ki he`ene fokotu`u `a e fatongia fo`ou ko e ...Nopelé... `o `ai ia ki he Konisitutoné ke tukufakaholó. Kuopau pe na`a ne tofanga `i ha faingata`a lahi `i hono filifili pe ko hai he hou`eikí ke hoko ko e nopelé pea ko hai `e `ikai fakapale`í. Kuopau pe na`e lahilahi `a e mamahi `iate kinautolu ne to he tufá.

Hili `a e `a`ahi `a e Tama Fatu Tutoné ki Senee `i `Aositeleliá, na`á ne liuaki mai ki Tonga pea na`á ne fakapapau`i `e `ikai ke teitei hoko ke `i ai ha taimi ke mole ai `a e kelekele `o e Tongá ki ha kau muli ka e paea faka`ofa holo `a e kakai Tongá `i honau fonuá. Na`a ne vahe leva `a e kelekele `o e fonuá `o `oange ia ke talasiti ai `a e kau nopelé pea toki vahevahe mei ai ki he tangata Tonga kotoa pe.

Na`e fai mai `a e nonofo `a e hou`eiki nopelé pea mo honau kaingá `i honau takitaha tofi`á `o fakalata pea nau vaofi. Na`e `ilokava ma`u pe `a e kau nopelé mo honau kaingá, pea na`á nau fa`a me`a lalo holo he koló he tukui `apí `o nau talanoa pea fatu ai `a e ma`uma`uluta `o e nofó mo e feongoí. Na`e ongo`i mo hapai `e he kaingá `a honau `eikí, pea na`e `ofa mo e ma`u tofiá `i hono kaingá. `I he ngaahi me`a fakakelekelé na`e fakamu`omu`a ma`u pe `a e fiema`u `a hono kaingá.

Ne faifai mai ia `a e fai fonongá mo e anga `o e fakalakalaká, pea kamata ke hiki `a e hou`eikí ia ki Nuku`alofa koe`uhi na`e `i ai kotoa `a e ngaahi faingamalié. Na`e toe muimui atu moe tokolahi `o e kaingá `o kamata leva ke hoko ai ha ngaahi nunu`a na`e `ikai fa`a lelei ki he nofo `a e fonuá. Koe`uhi ko e ngaahi fiema`u fakapa`angá, na`e liliu leva `a e hou`eikí ia kae mole atu `a e ngaahi `uhinga mo e ngaahi taumu`a `o e talasiti na`e tuku ange ma`a nautolu `e he `Uluaki Faa.

Na`e kamata ke ava `a e matapa ki he folau ki mulí, pea lahilahi leva `a e hikifonua `a e kaingá `o nau taka muli pea `oatu honau ngaahi familí mo honau ngaahi kaingá. Ko e toenga na`e kei nofo `i Tongá, na`á nau laku mo talafi pa`anga atu mei muli `o lato aipe `enau ngaahi fiema`ú. Ko e tokolahi leva na`a nau ngaue`aki pe `a e telefoni `o kole ki muli pea fakaongoongo pe ha tau ma`i `a e tohí pe ko e talafi silinií

Na`e hoko `a e fakalakalaka `o ne veitu`ua ai `a e nonofo feongoi `a e hou`eikí mo honau ngaahi kainga. Kuo heke leva `a e hou`eikí ia mei he`enau nofo lelei mo e kainga ke nau kau he fe`auhi he mamani `o e pisinisí koe`uhi ke kei mapukepuke honau tu`unga fakasosialé. Ko e fo`i laka `eni kuo ne fai `a e maumau`i lahi `o e nofó mo e anga `o e fekoekoe`i `a e hou`eikí mo honau kakaí. Kuo hoko `eni ia `a e kau mo`umo`ua `o e fonuá ko e kau hou`eiki fo`ou, pea kamata leva ke tau feta`aki mo felaka`aki.

`Oiaue, `a e ipu kuo mahua pe `e toe si`i tanaki fefe! Taumaia na`e lava ke toe fakafoki `a hui `o e uasi `o taimí ke tau toe saupulu pe mo monomono, pea `alu fakataha pe `a e fakalakalaká mo e nofo feongoongoi `a e fonuá.

Teu toki hoko atu!

`Ofa-ki-Tonga